"Dünyada nüvə silahının və strateji təhlükələrin əsas mənbəyi ABŞ-dir” - Çin rəsmisi
Ötən günlərdə ABŞ Prezidenti Co Baydenin mart ayında Çinin nüvə imkanlarının genişləndirilməsinə yönəlmiş məxfi nüvə strateji planını təsdiqlədiyi ortaya çıxıb. İddialara görə, yeni strategiya "nüvə silahlarının istifadəsinə dair Təlimat" (Nuclear Employment Guidance) adlanır və ABŞ-nin Rusiya, Şimali Koreya və Çin ilə münaqişə ehtimalını nəzərdə tutur. Lakin Ağ Ev strategiyanı rəsmən açıqlamayıb.
Sfera.az bildirir ki, bununla bağlı artıq Çindən reaksiya gəlib. Bu barədə Çin xarici işlər nazirliyinin sözçüsü Mao Ninq açıqlama verib.
O, Pekində keçirilən mətbuat konfransında çıxışı zamanı ABŞ-nin son illərdə ölkəsini “nüvə təhdidi” kimi qələmə verdiyini vurğulayıb:
“Bundan nüvə tərksilahı öhdəliyindən yayınmaq, nüvə arsenalını genişləndirmək və mütləq strateji üstünlük əldə etmək üçün bəhanə kimi istifadə ediblər. Lakin dünyada nüvə risklərinin və strateji təhlükələrin əsas mənbəyi ABŞ-dir”.
Mao Ninq vurğulayıb ki, Çinin nüvə arsenalının həcmi heç bir halda ABŞ ilə eyni səviyyədə deyil: “Biz çalışırıq ki, nüvə silahından ilk istifadə edən olmayaq. Nüvə potensialımızı milli müdafiə üçün tələb olunan minimum səviyyədə saxlayırıq. Bizim başqa ölkələrlə silahlanma yarışına girmək niyyətimiz yoxdur. ABŞ qlobal və regional sülhə xələl gətirən, nüvə ittifaqının genişləndirilməsi kimi mənfi addımlarına son qoymalıdır”.
Günay
