Ukrayna ordusunun Kursk əməliyyatı davam edir. Qərbin razılığı və hərbi dəstəyi fonunda Kiyev iki ildən sonra müharibəni Rusiya ərazisinə keçirə bilib. Bununla da bəzi ekspertlərin fikrincə, müharibənin gedişi dəyişib. 

Bununla bağlı Sfera.az-a açıqlama verən politoloq Məhəmməd Əsədullazadə deyib ki, Kursk və ətrafında əməliyyatlar uğurlu davam edərsə, Ukrayna qoşunları Rusiya ərazisindən Donbas və Xarkova da hücum edə bilər.

Onun sözlərinə görə, bu proses Rusiya üçün çətin olacaq:

“Rusiya çalışacaq ki, Belarusu Ukraynaya müharibəyə sövq etsin. Lakin Lukaşenko bu addıma getmək istəmir, çünki ordusu məğlub ola bilər. Belarusla sərhəddə Qərbin elit xüsusi dəstələri dayanıb. Həmin hücumda Belarus qoşunlarının güclü müqavimətlə qarşılaşması mümkündür. Həmçinin Belarus Ukraynaya qoşun yeritsə, Polşa Belarusa hücum edə bilər. Ona görə də Belarus Prezidenti Aleksandr Lukaşenko Moskvanın aktiv hərbi oyununda iştirak etmək istəmir”.

Ekspert qeyd edib ki, Ukrayna hərbi siyasi rəhbərliyinin Kursk əməliyyatı Rusiyaya gecikmiş cavab zərbəsidir:

“Demək olar ki, Ukraynanın Rusiya ərazisinə xüsusi hərbi əməliyyatı Moskva üçün "soyuq duş effekti" yaradıb. Belə bir əməliyyatı Kremldə gözləmirdilər. Rusiyanın yeni müdafiə naziri Belousov çətin sınaqlarla üz-üzədir. Hazırda həm psixoloji, həm də hərbi baxımdan üstünlük Ukrayna tərəfinə keçib. Əməliyyatla Kiyev bir neçə məqsədə nail olmağa çalışır: Rusiyanı danışıqlar masasında güzəştə məcbur etmək; Rusiya qoşunlarının Ukrayna ərazisində möhkəmlənməsinin qarşısını almaq”.

Günay