"Zaxarova o bəyanatı ilə ABŞ-yə mesaj verir ki, Ermənistanı..." - AÇIQLAMA

Ötən gün Rusiya xarici işlər nazirliyinin sözçüsü Mariya Zaxarova Moskvanın İrəvana qardaş dəstəyinin bundan sonra da davam edəcəyini deyib. O qeyd edib ki, ABŞ-nin Ermənistanın Rusiyadan üz döndərdiyi barədə bəyanatları əsassızdır: “İki ölkə arasında əsrlərdir, formalaşan əlaqələr Qərbin bütün sınaqlarına tab gətirə biləcək”. 

Maraqlıdır, Zaxarovanın sözügedən açıqlaması nəyə hesablanıb?

Bununla bağlı Sfera.az-a danışan siyasi şərhçi Kənan Novruzov bildirib ki, XİN rəsmisinin fikirləri hər şeydən əvvəl ABŞ-yə mesaj idi:

“Zaxarova bu açıqlama ilə demək istəyirdi ki, ABŞ Ermənistanı belə asanlıqla Rusiyanın təsirindən çıxara bilməz. Bu həm də Ermənistana mesaj kimi qiymətləndirilməlidir. XİN rəsmisi İrəvana demək istəyib ki, onun Rusiyanın təsirindən çıxması bu qədər sadə məsələ deyil. Əlbəttə, Rusiya heç də Ermənistanın “qaş- gözünə vurulmayıb”. Sadəcə olaraq, indiki məqamda Ermənistan həm Qərb, həm də Moskva üçün strateji əhəmiyyətli aktordur, çünki İrəvan regionun ən zəif bəndidir. Ermənistana təsir etmək və beləliklə, bölgədəki təsir imkanlarını gücləndirmək həm Rusiya, həm də Qərb üçün daha rahatdır. Tərəflər Ermənistana daha çox təsir imkanına malik olmaq üçün bütün imkanlardan, o cümlədən psixoloji təzyiq vasitələrindən istifadə edirlər”.

K.Novruzov bildirib ki, ABŞ bundan sonra da Ermənistanı Rusiyadan uzaqlaşdırmaq istiqamətində səylərini davam etdirəcək:

“Bu, təxminən Ukrayna ssenarisini xatırladır. Hazırda Ermənistan Rusiya ilə Qərb arasında siyasi poliqona çevrilib. Gələcəkdə Ermənistanın eyni ilə Ukrayna kimi hərbi poliqona çevrilməsi də istisna deyil”.

Günay