"Mahmud Abbasın Ərdoğanla görüşündən sonra..." - Yaxın Şərqdə sülh gözlənilir?
Fələstin Prezidenti Mahmud Abbas Rusiya KİV-inə müsahibəsində deyib ki, Fələstin sülh konfransı çərçivəsində İsraillə yekun statusla bağlı danışıqlara hazırdır. O vurğulayıb ki, təqdim olunan həll müəyyən vaxt qrafikinə uyğun olaraq beynəlxalq sülh konfransı çərçivəsində İsraillə yekun statusla bağlı danışıqlara başlamağı və regional təhlükəsizlik mexanizminin işlənib hazırlanmasını nəzərdə tutur.
Yaxın Şərqdə sülh gözlənilirmi?
Bununla bağlı Sfera.az-a açıqlama verən siyasi şərhçi Kənan Novruzov deyib ki, M.Abbasın bu açıqlaması Fələstinin geri çəkilməsi və ya təslim olmağa hazırlaşması kimi qiymətləndirilməməlidir:
“Fələstin indiki halda İsraillə müəyyən konsensusun əldə edilməsinə çalışa bilər. İsrail isə buna yaxın durmaz. Hətta İsrail istəsə belə, ABŞ prosesə mane olacaq və mümkün qədər çalışacaq ki, ehtimal olunan danışıqların qarşısını alsın. Bu nöqteyi-nəzərdən yaxın gələcəkdə Yaxın Şərqdə “suların durulacağı” inandırıcı görünmür. Əksinə, perspektivdə müharibənin genişlənməsi ehtimalı daha realdır”.
K.Novruzov xatırlatdı ki, M.Abbas bu açıqlamanı Türkiyəyə səfəri ərəfəsində verib:
“O, avqustun 14-15-də Türkiyədə olacaq, həmkarı Rəcəb Tayyib Ərdoğanla görüşəcək. M.Abbasın R.T.Ərdoğanla görüşündən sonra fərqli açıqlamalar verməsi mümkündür. Ola bilsin ki, HƏMAS-ın tanınan şəxslərinin, liderlərinin ard-arda öldürülməsi Fələstin hökumətində müəyyən mənada ruh düşkünlüyü yaradıb. Buna baxmayaraq, bu, müharibənin yaxın vaxtda başa çatacağı üçün əsas deyil. Çünki ABŞ buna mümkün qədər mane olmağa çalışacaq. İsrailin isə hələ ki dayanmaq fikri yoxdur. Əksinə, mümkündür ki, İsrail müharibənin növbəti mərhələsinə hazırlaşsın. Müharibənin yaxın gələcəkdə başa çatacağı inandırıcı deyil”.
Günay
