İyulun 22-də Qarabağın tacı, mədəniyyət paytaxtımız Şuşada növbəti dəfə tarixi bir gün yaşandı. Azərbaycan Respublikasının Medianın İnkişafı Agentliyinin (MEDİA) təşkilatçılığı ilə Şuşada Milli Mətbuat Günü münasibətilə “Mediada qlobal trendlər, yeni çağırışlar” mövzusunda Beynəlxalq Media Forumu keçirildi. Tədbirə ölkə jurnalistləri, Qarabağımızın - Şuşanın azad olunmasında iştirak edən bir qrup qazimizlə yanaşı, 20-dək ölkədən xarici media nümayəndələri və ekspertlər də qatılıb. Hər bir qonaq Şuşanın gözəlliyinə heyran qalıb.

Bəs bu tədbirin Şuşada keçirilməsi nəyi ifadə edir?

Mövzu ilə bağlı Sfera.az-a danışan Milli Məclisin deputatı Ceyhun Məmmədov bidlrib ki, bu gün Şuşa bir çox beynəlxalq tədbirlərə ev sahibliyi edən məkana çevrilib.

“Tədbirin Şuşada keçirilməsi çox önəmlidir. Artıq ikinci ildir ki, Şuşada Beynəlxalq Forum keçirilir. Beynəlxalq media nümayəndələri Azərbaycana gəlir və bu tədbirə qatılırlar, Prezidentin mesajlarını da buradan alırlar. Təbii ki, Beynəlxalq forumun azad ərazidə, azad Şuşada keçirilməsinin də bəlli çalarları var. Yəni öz rəmzi mənası var. Bu o deməkdir ki, Azərbaycan həqiqətləri həm də Beynəlxalq ictimaiyyətə daha dolğun, daha dəqiq çatdırılması baxımından da biz bunu müsbət dəyərləndirə bilərik. Forumda Prezident İlham Əliyev çıxışı zamanı çox mühüm məsələlərə toxunub. Bu gün Cənubi Qafqaz yeni bir reallığa daxil olub. Bu reallığı Prezidentin rəhbərliyi ilə Azərbaycan yaradıb. Əslində bir çox Qərb dövlətlərinin əsas hədəfi və məqsədi bu torpaqların davamlı olaraq işğalda qalması idi. Ona görə bizə hər zaman deyirdilər ki, siz müharibə edə bilməzsiniz, siz işğalla barışmalısınız. Yalnız biz bu deyilənlərə məhəl qoymadıq, həm müharibə meydanında bu döyüşü apardıq, həm də informasiya müharibəsində qalib gəldik. Bu gün Qafqazda yeni bir reallıq yaranıb, çoxlarının arzusu ürəyində qalıb. Onlar Ermənistanın gücləndirilməsi üçün, daim qələbəsinin təmin olunmasına addımlar atırdılar. Azərbaycan onların bütün cəhdlərinin qarşısını alaraq Cənubi Qafqazda yeni reallığı yaratmağa nail oldu”.

Ceyhun Məmmədov qeyd edib ki, bu gün Cənubi Qafqazın mərkəzi Azərbaycandır.

“Hər zaman Prezidentin qeyd etdiyi kimi, Azərbaycanın razılığı olmadan bölgədə heç bir addım atıla bilməz, heç bir plan həyata keçirilə bilməz. Bu gün bütün məsələlər Azərbaycanın razılığı ilə həyata keçirilir. Bu gün Azərbaycan qalib xalqdır. Bu gün Azərbaycan sülh istəyir. Azərbaycan sülhün şərtlərini beynəlxalq hüquqa diktə edir və bunun üçün səylə çalışır. Bir tərəfdə Azərbaycan var, sözümüz imzamızdır deyən Prezidentimiz, digər tərəfdə isə yalançı, saxtakar Ermənistan. Hansı ki, Prezident çox gözəl formada qeyd edib: Britaniyaya gedib görüşdən imtina edən, digər tərəfdən müxtəlif platformalardan, sülhdən və konstitusiyanın dəyişdirilməsindən dəm vuran Ermənistan bir daha özlərini ifşa etdi. Bu, yeni bir mərhələdir və biz buna hazırıq. Biz bu gün çox ciddi layihələr həyata keçiririk, qonşularımızla münasibətimizi inkişaf etdiririk”.

Qeyd: Məqalə Medianın İnkişafı Agentliyinin maliyyə dəstəyi ilə hazırlanıb.

Mövzu: İşğaldan azad olunmuş ərazilərə “Böyük Qayıdış”.