Bayden prezidentlik yarışından geri çəkildikdən sonra nə baş verib?
![Bayden prezidentlik yarışından geri çəkildikdən sonra nə baş verib?](https://sfera.az/photo/orginal/2024/07/22/1721657001_bayden.png)
Xəbər verdiyimiz kimi, ABŞ-nin Prezidenti Co Bayden yenidən dövlət başçısı seçilmək istəməyəcəyini bəyan edib və vitse-prezident Kamala Harrisi qarşıdan gələn prezident seçkilərində Demokrat Partiyasının namizədi kimi dəstəkləyib.
Bəs, Bayden prezidentlik yarışından geri çəkildikdən sonra nə baş verib?
Sfera.az “TASS”ın bu barədə hazırladığı məqaləsini təqdim edir.
“Politico” qəzetinin yazdığına görə, Baydeni ən yaxın müşaviri Mayk Donilon və Stiven Riçetti yarışdan çıxmağa razı salıb. Onlar hazırkı prezidentin seçkilərdə qalib gəlmək imkanları ilə bağlı narahatlığını onun diqqətinə çatdırıb, təşviqat kampaniyası zamanı ianələrin azalması barədə məlumat verib və onun noyabr ayında qalib gəlmək üçün heç bir şansının olmadığını göstərən ictimai rəy sorğularının nəticələrini təqdim ediblər.
Bu arada, “CNN” ABŞ rəsmisinə istinadən bildirib ki, Baydenin geri çəkilməsi səhhətində heç bir problemlə bağlı deyil.
“Politico” bildirib ki, bazar günü axşam saatlarında ABŞ-nin ən azı 26 Demokrat senatoru və ABŞ Nümayəndələr Palatasının 72 üzvü Harrisin partiyanın prezidentliyə namizədi kimi irəli sürülməsini təsdiqləyib. Bundan əlavə, Nyu-Cersi, Nyu York, Kaliforniya, Miçiqan və Pensilvaniya da daxil olmaqla bir sıra ABŞ qubernatorları Harrisi dəstəklədiklərini bildiriblər.
Harrisin seçki qərargahı artıq 55 milyon dollardan çox ianə toplayıb. Baydenin yarışdan çəkilməsindən sonra ilk beş saat ərzində 27,5 milyon dollar toplanıb. “Politico” əvvəllər Baydenin iyunun sonuna qədər topladığı 95 milyon dollarlıq ianənin hamısının Harrisin kampaniyasına gedəcəyini bildirmişdi.
“The Washington Examiner” bildirib ki, Harrisdən başqa bir siyasətçi partiyanın namizədi olarsa, vəsait donorlara qaytarılmalı olacaq. ABŞ-nin vitse-prezidenti Kamala Harrisin Demokratlar Partiyasından namizəd kimi irəli sürülməsi ilə bağlı səsvermənin avqustun 1-də keçiriləcəyi gözlənilir. Beləliklə, Harrisin namizədliyi partiyanın avqustun 19-22-də Çikaqoda (İllinoys ştatı) keçiriləcək milli qurultayı öncəsi təsdiqlənə bilər. Müvafiq olaraq, onun namizədliyinə qarşı çıxanların "yox" demək üçün cəmi on günü var.
Bir sıra ABŞ rəsmiləri və Demokratik donorlar 2024-cü ilin mayında Demokratlar Partiyasını tərk etmiş müstəqil senator Co Mançini (Qərbi Virciniyadan) partiyaya qayıtmağa və prezident seçkilərində namizədliyini irəli sürməyə çağırırlar. Eyni zamanda, “Reuters” agentliyi mənbələrə istinadən xəbər verir ki, ABŞ Demokratlar Partiyasının bütün 50 ştatdakı “regional qərargahlarının rəhbərləri” Harrisin namizədliyini dəstəkləyiblər.
Baydenin yarışdan geri çəkilməsinə münasibət bildirən ABŞ-nin keçmiş prezidenti Donald Tramp özünü ABŞ tarixinin ən pis prezidenti hesab etdiyini deyib və Kamala Harrisi məğlub etməkdə çətinlik çəkməyəcəyini bildirib.
ABŞ Nümayəndələr Palatasının üzvü Nensi Meys (Cənubi Karolina ştatından olan respublikaçı) prezident səlahiyyətlərinin Baydendən Harrisə ötürülməsini tələb edən qətnamə təqdim etmək niyyətindədir.
Rusiya Xarici İşlər Nazirliyinin sözçüsü Mariya Zaxarova bildirib ki, üç il yarım ərzində Bayden dəfələrlə Ukrayna ətrafındakı vəziyyətlə bağlı dünya böhranına səbəb olan “anlaşılmaz” qərarlar qəbul edib.
Kremlin sözçüsü Dmitri Peskov isə ABŞ seçkilərinə 4 ay qaldığını və “hələ çox şeyin dəyişə biləcəyini” söyləyərək, gözləmə mövqeyi tutmağa qərar verib.
Firuzə Əliyeva