ABŞ-nin keçmiş prezidenti Barak Obama da Baydenin namizədliyini geri götürməsi çağırışlarına qoşulub.

Sfera.az bildirir ki, bu barədə “CNN International” nəşri iddia irəli sürüb. Qeyd olunub ki, hazırda ABŞ-nin siyasi arenası həmişəkindən daha mürəkkəbdir. 

Nəşr vurğulayıb ki, son günlər xüsusilə Donald Trampa qarşı edilən sui-qəsd cəhdi və ABŞ Prezidenti Co Baydenin yaşı, psixi sağlamlığı ilə bağlı müzakirələr davam edir: “Bayden həmişəkindən daha təkdir. Ağ Evdəki bir çox yüksək vəzifəli məmur düşünür ki, prezident öz namizədliyini geri götürməlidir. Buna Barak Obama da qoşulub”.

“CNN”ə danışan demokrat bir qubernator bildirib ki, qarşıdakı 72 saat Bayden üçün çox kritik olacaq. Həmçinin ABŞ mətbuatının yazdığına görə, qarşıdan gələn prezident seçkilərində Demokratlar Partiyasından namizəd kimi iştirak edən Co Baydenə qarşı müxalif olanların sayı artmaqdadır.

“Washington Post” qəzeti qeyd edib ki, Barak Obama da Baydenin şansının getdikcə azaldığını bəyan edib. “Obama Trampla televiziya proqramından sonra Baydenlə bir dəfə görüşsə də, o, pərdəarxası seçki kampaniyasının gələcəyi ilə bağlı danışıqlarda çox iştirak edir. Baydenin hər fürsətdə “əla prezident” olduğunu bildirən Obama özünü bir növ məsləhətçi kimi görür və müttəfiqlərinə Baydeni və onun irsini qorumaq istədiyini bildirir. Lakin son vaxtlar sorğuların ciddi şəkildə azalması keçmiş prezidentin narahatlığını yüksək səslə dilə gətirməsinə səbəb olub”, - qəzet vurğulayıb.

Obamanın sözçüsü isə bu iddianı şərh etməkdən imtina edib.

Günay