"Cavab tədbirləri görəcəyik!" - ABŞ səfiri Rusiya XİN-ə ÇAĞIRILDI

ABŞ-nin Moskvadakı səfiri Lin Treysi bazar ertəsi Sevastopolda baş vermiş hücumla əlaqədar Rusiya Xarici İşlər Nazirliyinə çağırılıb.

Sfera.az bu barədə Rusiya mediasına istinadən xəbər verir.

“İyunun 24-də Rusiya Xarici İşlər Nazirliyində ABŞ-nin Rusiyadakı diplomatik missiyasının rəhbəri Treysi ilə söhbət zamanı Kiyev rejiminin daha bir ölümcül cinayətinə, Vaşinqtonun himayədarlığı və silahlandırması ilə qəsdən raket zərbəsi endirilməsinə etiraz edilib. Sevastopolda dinc sakinlərə hücum, çoxlu itkilərə, o cümlədən uşaqların ölümünə səbəb olub”, - nazirlik bildirib.

Rusiya Xarici İşlər Nazirliyi bildirib ki, Rusiyaya qarşı hibrid müharibə aparan ABŞ əslində Ukrayna ordusunu “ATACMS” raketləri də daxil olmaqla ən qabaqcıl silahlarla təmin etməklə münaqişənin tərəfinə çevrilib. 

"Səfirə bildirilib ki, Vaşinqtonun bu cür hərəkətləri cavabsız qalmayacaq. Cavab tədbirləri mütləq olacaq”, - Rusiya XİN vurğulayıb.

Rusiya mətbuatının yazdığına görə, Ukrayna bazar günü kaset sursatları ilə təchiz edilmiş “ATACMS” taktiki raketlərindən istifadə edərək Sevastopolda mülki infrastruktura hücum edib. Dörd raket zərərsizləşdirilib, beşincisi şəhərin üzərində partlayıb. Sevastopol qubernatoru Mixail Razvozhayev bildirib ki, hücum nəticəsində ikisi uşaq olmaqla 4 nəfər ölüb, 150-dən çox insan yaralanıb.Rusiya İstintaq Komitəsi terror aktı ilə bağlı cinayət işi açıb. 24 iyun Sevastopol və Krımda matəm günü kimi təyin edilib. Putin Sevastopol sakinlərinə başsağlığı verib.

Firuzə Əliyeva