Ermənistan hökuməti Avropa İttifaqının (Aİ) Avropa Komissiyası ilə dövlət və dayanıqlılığın gücləndirilməsi üzrə maliyyələşdirmə sazişini təsdiqləyib.

Sfera.az xəbər verir ki, bu barədə erməni mətbuatı məlumat yayıb.

Qərarın izahatında bildirilir ki, bu maliyyələşdirmə sazişinin məqsədi Ermənistanın sosial və iqtisadi dayanıqlılığına kömək etmək, xüsusən də Ermənistan hökumətinin qısa və orta müddətli problemlərinin həlli siyasətinə töhfə vermək, eləcə də onların Ermənistanda uzunmüddətli sosial-iqtisadi inteqrasiyasını təmin etmək, həmçinin Aİ-nin Ermənistanda iqtisadi və investisiya proqramının həyata keçirilməsini təşviq etməkdir.

Ümumi dəyəri 15 milyon avro olan layihə Aİ büdcəsindən maliyyələşdiriləcək.

Ermənistanın Baş nazirinin müavini Mher Qriqoryan qeyd edib ki, bu gün onlar daha bir layihəni təsdiqləyiblər ki, bu layihəyə əsasən, Aİ Ermənistana əlavə 3 milyon avro ayıracaq. Məqsəd Ermənistan hökumətinə daha geniş islahatlar prosesində yardım etmək, eləcə də Qarabağdan gedən ermənilərin sosial-iqtisadi, xüsusən də səhiyyə, sosial müdafiə və məşğulluq strategiyalarının həyata keçirilməsinə daha çox cəlb edilməsidir.

Firuzə Əliyeva