"Uzun illər kölgəsini qılınclayanlar, indi gedib Ulu Öndərdən əfv diləsinlər" - Zahid Oruc
“15 iyun yalnız 90-cı illərin təqvim hadisəsi deyil və 20 sentyabr 2023-cü ildən sonra bütün əzəməti ilə aydın görünən dönüş nöqtəsidir”.
Sfera.az xəbər verir ki, bunu Milli Məclisin 14 iyun tarixli növbədənkənar plenar iclasında deputat Zahid Oruc deyib.
“Əslində, Ulu Öndərin tərcümeyi-halının yarım əsri onlarla xilaskarlıq səhifəsi ilə doludur. Stalinin qurduğu imperiyada çekist sistemindən hakimiyyət birinciliyinə gəlmək, Nərimanov və Bağırovun acı taleyindən sonra 1969-cu ildə Azərbaycana rəhbərlik etmək əsil Qurtuluş hadisəsi idi. Çünki çarizm, cümhuriyyət və sovet dövrü liderlərinin heç biri onun qədər yüksələ, uzun illər zirvədə qala və ikinci dəfə hakimiyyətə qayıda bilmədilər. Belə siyasi uzunömürlülük xalqımızın və hələ yenicə formalaşan milli dövlətimizin də möhkəmlik testi oldu. Beləliklə, 8 noyabr Zəfəri son 50 illik Əliyev kursunun parlaq nəticəsidir. İndi ölkəmizə qələbə gətirən “Dəmir Yumruq” əslində Heydər Əliyevə aid müharibə simvoludur. Ordusuz Horadiz əməliyyatı, silahsız etnik separatizmin məhvi, büdcəsiz qlobal neft savaşının udulması və nəhayət, bu parlament binasında oynanılan antixalq tamaşalarının durdurulması həmin “dəmir iradə”nin nəticəsidir”.
“Üç gün əvvəl öz xalqının məfkurəsində çevriliş edən Nikol Paşinyanın Ermənistanı özü boyda Patriarxata döndərmək istəyənlərə üzünü tutaraq, “Lissabon sammitindən sonra erməni rəhbərlər məğlub oldular və yalan danışdılar, 2018-ci ildə bunları biləndə gərək Qarabağı Azərbaycanın tərkibində tanıyaydım” deməsi Ulu Öndərin ruhunun təntənəsi idi. Uzun illər Əliyevin kölgəsini qılınclayanlar, indi gedib böyük liderdən əfv diləsinlər. Ona qalib gələ bilməyənlər, son 4 ildə də İlham Əliyevə məğlub oldular”,- millət vəkili qeyd edib.
Firuzə Əliyeva
