Paşinyan COP29-da iştirak üçün 3 şərt İRƏLİ SÜRDÜ - Bakının reaksiyası nə olacaq?
Noyabrda Bakıda keçiriləcək COP29 sammitində Ermənistanın Baş naziri Nikol Paşinyanın iştirak edib-etməyəcəyi müzakirə olunur. Baş nazirin mətbuat katibi Nazeli Bağdasaryan isə Paşinyanın Bakıya səfər edəcəyi ilə bağlı yayılan xəbərləri təkzib edib.
Bununla bağlı Sfera.az-a açıqlama verən siyasi şərhçi Asif Nərimanlı deyib ki, qarşı tərəf bu haqda xəbərləri təkzib etsə də, bu, mümkündür.
Onun sözlərinə görə, Bakı və İrəvanın COP29 tədbirinə qədər sülh sazişinə irəliləyiş əldə etməsi gözlənilən ssenarilərdəndir:
“Nə Bakı, nə də İrəvan məsələyə soyuq yanaşır. Noyabra qədər sülh sazişi ilə bağlı irəliləyiş olarsa, Paşinyanın COP29 tədbirində iştirakı gözlənilən variantlardandır. Bu, Ermənistanın COP29-a ev sahibliyi üçün namizədliyini Azərbaycanın xeyrinə geri götürməsi siyasətinin də məntiqi davamı ola bilər. Paşinyanın özünün də Bakıya gəlmək istədiyi istisna edilməməlidir. Belə bir dəvətdən imtina onun sülhə qarşı olduğu imicini yarada bilər. Çünki noyabra qədər sülh sazişi ilə bağlı irəliləyişin əldə edilməsi və COP29-da Ermənistan liderinin iştirakını beynəlxalq oyunçular istəyir”.
Ekspert bildirib ki, bunu anlayan Paşinyan Bakıya səfəri üçün yeni şərt irəli sürür:
“Bakıda həbsdə olan ermənilər noyabra qədər azad edilsə, Ermənistanın COP29 tədbirində Baş nazir səviyyəsində iştirakı müzakirə edilə bilər. Bu şərt rəsmi İrəvan tərəfindən yox, hakimiyyətə yaxın media tərəfindən ortaya atılıb. İstisna deyil ki, rəsmi İrəvanın tezisləri əsasında hazırlanıb. Ermənistan hakimiyyətinin bu “şərti”nin bir neçə hədəfi var. Birincisi, COP29-da iştirakdan imtinasını beynəlxalq ictimai rəydə əsaslandırmağa və bununla “sülhə qarşı” olmadığını göstərməyə çalışır. İkincisi, beynəlxalq diqqəti Bakıda həbsdə olan cinayətkar ermənilərə yönəltmək istəyir və COP29-u onların buraxılması üçün fürsət olaraq görür. Üçüncüsü, həbsdə olan ermənilərin azad edilməsinə nail olarsa, daxili ictimai rəydə xal qazana bilər.
Mümkündür ki, COP29 tədbirinə qədər Ermənistanın bu “şərti” rəsmi səviyyədə irəli sürülə bilər. Azərbaycanın separatçılar istisna olmaqla, digər ermənilərin Ermənistana təhvil verməsi də mümkün variantlardandır. Separatçılar Paşinyanın özünə də lazım deyil”.
Günay
