"Baydenin Ukraynaya verdiyi icazə seçkilərdə Trampın əlini gücləndirəcək" - ŞƏRH
“Baydenin Ukraynaya ABŞ silahlarından Rusiya ərazisində istifadəyə icazə verməsi ilə bağlı iddialar informasiya müharibəsinin tərkib hissəsi də ola bilər”.
Bunu Sfera.az-a açıqlamasında siyasi şərhçi Kənan Novruzov deyib.
O qeyd edib ki, bu mənada yazılanlara etibarlı mənbə kimi yanaşmaq doğru olmaz:
“Hər halda bu barədə hələ ki heç bir rəsmi açıqlama yoxdur. Ağ Evin Ukraynanın ABŞ istehsallı silahlarla Rusiya ərazisinə zərbələr endirməyə icazə verməsi o deməkdir ki, Vaşinqton Moskva ilə birbaşa toqquşmaya və hətta nüvə silahının tətbiqinə hazırdır. Bayden prezident seçkiləri ərəfəsində belə bir qərar verməklə tərəfdarlarının sayını artıra və beynəlxalq ictimaiyyət arasında azalan nüfuzunu bərpa etməyə çalışa bilər. Hərçənd Respublikaçıların və bu partiyanın əsas namizədlərindən biri olan keçmiş dövlət başçısı Donald Trampın Baydenin mümkün sözügedən qərarından öz xeyrinə istifadə edəcəyi və qarşı tərəfi ittiham edəcəyi də şübhəsizdir”.
Müsahibimiz xatırladıb ki, Rusiya son zamanlar ən ali səviyyədə sülhə hazır olduğunu deyir:
“Ukrayna isə hələ ki bu təklifə yaxın durmur. Aydın məsələdir ki, Kiyev Vaşinqtonun təsiri ilə belə davranır. Amma ola bilsin, Ağ Evdə düşünürlər ki, Amerika silahları ilə Rusiya ərazisinə zərbələrin endirilməsi Moskvanın ritorikasına təsir edər və ehtimal olunan razılığın qarşısını ala bilər. Beləliklə, savaş nəinki uzanacaq, həm də yeni, daha mürəkkəb fazaya keçəcək. İddialara inansaq, deyə bilərik ki, zərbə obyektlərini və silahlardan necə istifadə etməyi də ABŞ müəyyənləşdirəcək. Bu isə o deməkdir ki, Ukrayna artıq müstəqil deyil. Ağ Ev bütün hallarda Ukraynanı deyil, öz maraqlarını düşünür. Deməli, hansı addımın atılmasından asılı olmayaraq, Kiyev qurban rolunu oynamağa davam edəcək”.
Günay
