"Paşinyan istefasını tələb edən keşiş Baqratla görüşsə..." - AÇIQLAMA

İrəvanda ümumilikdə 273 etirazçı saxlanılıb. Bu barədə Ermənistan Daxili İşlər Nazirliyinin saat 13:00-a olan məlumatında bildirilib. Qeyd olunub ki, saxlanılan şəxslər İnzibati Xətalar Məcəlləsinin 182-ci (polis əməkdaşının qanuni tələbinə tabe olmama) maddəsi ilə polis şöbələrinə aparılıblar.

Artıq bir neçə müddətdir, İrəvanda Paşinyan hakimiyyəti əleyhinə etirazlar davam edir. Aksiyalar aprelin 19-da İrəvanla Bakı arasında Tavuşda sərhədin delimitasiyası ilə bağlı razılığın əldə olunmasından sonra başlayıb. Mayın 9-da Tavuşdan İrəvana yürüşə rəhbərlik edən arxiyepiskop Baqrat Qalstanyan Baş nazir Nikol Paşinyanı istefaya çağırıb, həm də görüş tələb edib.

Maraqlıdır, hadisələr necə cərəyan edəcək?

Bununla bağlı Sfera.az-a açıqlama verən politoloq Məhəmməd Əsədullazadə deyib ki, Paşinyan keşiş Baqratla görüşsə, etirazlara siyasi yük verəcək:

“Bundan sonra Baqratın siyasi mövqeyi güclənəcək. Fikrimcə, keşişin Paşinyanla görüşməyə cəhdi də siyasi etirazlara diqqət çəkməyə və hakimiyyətin onunla hesablaşdığını nümayiş etdirməyə xidmət edir. Ermənistan Baş naziri də keşiş Baqratın bu planından xəbərsiz deyil. Ona görə də onunla görüşüb Baqrata siyasi xal qazandırmayacaq”.

Müsahibimiz bildirib ki,  Paşinyan keşişlə görüşsə, Baqrat ondan istefasını tələb edəcək:

“Necə ki, 2018-ci ildə Paşinyan Sarkisyanla ilk görüşündə ondan istefasını tələb etdi, indi də eyni ssenarini Baqrat həyata keçirmək istəyir.  Bu da onu göstərir ki, prosesdə Serj Sarkisyan və Robert Koçaryanın da əli var və onlar siyasi revanş edirlər. Lakin kilsəyə xalqın və Qərbin dəstəyi olmadığı üçün bu aksiyalar uğursuzdur. Rusiyanın mövqeyi kifayət qədər zəifləyib. Paşinyan etirazlara lokal şəkildə güc tətbiq edəcək, onları azaldacaq. Ümumiyyətlə, Ermənistanda etiraz aksiyalarının müsbət nəticəsi regionun təhlükəsizliyini və bu ölkənin daxili siyasətini təhdid edə bilər”.

Günay