Rusiyada prezident seçkiləri BAŞLADI: İlk dəfədir ki... - FOTOLAR 

Bu gün Rusiya prezidentinin seçilməsi üçün təşkil olunan 3 günlük marafon başlayıb.

Sfera.az bildirir ki, sabah və bazar günü də davam edəcək prosesdə 112 milyon 309 min qeydiyyatdan keçmiş seçici səs verəcək. Məntəqələr səhər saat 8-dən axşam 8-dək açıq olacaq. Rusiyanın ucqar bölgələrində yaşayan 29 regionun seçiciləri bu seçkidə ilk dəfə onlayn səs verə biləcəklər. Xaricdə yaşayan 1,9 milyon Rusiya vətəndaşı səfirliklərdə, konsulluqlarda və ya poçt vasitəsilə səsvermə hüquqlarından istifadə edəcəklər.

Məlumata görə, Rusiyanın 2014-cü ildə Ukraynadan ilhaq etdiyi Krımda və 2022-ci ildə işğal etdiyi Donetsk, Luqansk, Xerson və Zaporojya bölgələrində seçki qutularının qurulacaq. Seçkilərdə hazırkı Prezident Vladimir Putinlə yanaşı, Liberal Demokrat Partiyasının sədri Leonid Slutski, Kommunist Partiyasının namizədi Nikolay Xaritonov və Yeni Xalq Partiyası adından Vladislav Davankov mübarizə aparacaq.

Qərb mətbuatında aparılan təhlillər göstərir ki, hər üç namizəd Putin üçün real təhlükə yaratmır. Rusiyalılar tarixdə ilk dəfə prezident seçkiləri prosesində üç gün səs verəcəklər. Bu format ilk dəfə 2020-ci ildə pandemiya səbəbindən əhalinin sağlamlığını qorumaq üçün konstitusiya referendumunda sınaqdan keçirilib. Müstəqil müşahidəçilər isə bu üsulu tənqid edir və bunun səsvermə prosesinin şəffaflığını təmin etməyi çətinləşdirdiyini bildirirlər.

Digər tərəfdən, əsasən, ruslardan ibarət Ukrayna milis qrupları son bir həftədir Rusiyanın cənubundakı Kursk və Belqorod vilayətlərinə girməyə cəhd edirlər.

“Azad Rusiya legionu” adlı qrup dünən verdiyi açıqlamada məqsədlərinin Rusiyada keçiriləcək seçkiləri pozmaq olduğunu açıq şəkildə ifadə edib və Rusiya şəhərlərində mülki əhalinin təxliyyəsinə çağırıb. Eyni zamanda, bir müddət əvvəl həbsxanada şübhəli şəkildə dünyasını dəyişən müxalif rusiyalı siyasətçi Aleksey Navalninin həyat yoldaşı Yuliya Navalnaya seçkilərdə Putinə etiraz etməyə səsləyib.

Günay