Rusiya sanksiyalara qarşı BU ADDIMI ATDI: "240 milyard dollar..." - AÇIQLAMA
Rusiyanın sanksiyalara qarşı yeni planı var.
Sfera.az bildirir ki, bu barədə Qərb mediası məlumat dərc edib. Qeyd olunub ki, Moskva, Rusiyanı Çinlə birləşdirən iki mühüm şərq dəmir yolu xəttini yaxşılaşdırmaq üçün milyardlarla dollar xərcləyib. “New York Times” qəzetinin xəbərinə görə, Moskva indi Hindistan və Fars körfəzi ölkələri ilə dəmir yolu vasitəsilə əlaqə yaratmağa hazırlaşır.
“1,7 milyard dollara başa gələcək yeni Cənub marşrutu Rusiya və İrandakı limanları birləşdirəcək və həmçinin Rusiyanı Hindistanın ticarət mərkəzi olan Mumbayla birləşdirməyə kömək edəcək”, - bildirilib.
Nəşr qeyd edib ki, sözügedən dəmir yolunun tikintisinə bu il başlanması planlaşdırılır.
“Rusiyanın dəmir yolu nəqliyyatına diqqət etməsi Qərbin iki illik sanksiyalarından sonra baş verir. Məhdudiyyətlər Rusiyanın ənənəvi olaraq ən böyük bazarı olan Avropa ilə ticarətinə zərbə vurub və Moskvanı Çin və İran kimi alternativ bazarlara üz tutmağa vadar edib. Təhlillər göstərir ki, yeni dəmir yolu əlaqələri sanksiyalar fonunda Rusiya idxalının davam etdirilməsinə kömək edəcək”, - əlavə edilib.
Mövzu ilə bağlı Corc Vaşinqton Universitetinin siyasi elmlər üzrə professoru David Szakonyi “Business Insider”ə açıqlamasında bunları deyib:
"Cənubla münasibətlərin yaxşılaşdırılması Rusiyanın əsas prioritetlərindən biridir. Yeni ticarət əlaqələri təkcə Rusiyaya neft və qazı alternativ bazarlara satmağa imkan yaratmayacaq, həm də ölkəyə işçi qüvvəsi çatışmazlığı səbəbindən istehsal edə bilmədiyi malların idxalına kömək edəcək”.
Qeyd edək ki, Rusiya ilə Çin arasında ticarət 2021-ci ildən bəri təxminən 63 faiz artaraq 2023-cü ildə 240 milyard dollardan çox olub. Moskvanın Hindistanla ticarət əlaqələri də genişlənməkdə davam edir. İki ölkə arasında ticarət dövriyyəsi 65 milyard dollara çatıb ki, bu da 2021-ci illə müqayisədə dörd dəfə çoxdur.
Günay
