Rusiya BMT-nin toplanmasını TƏLƏB ETDİ: "Yenidən araşdırılsın!"

Rusiya “Şimal axını” qaz kəmərlərinə təxribat aktlarının təhqiqatına dair BMT Təhlükəsizlik Şurasının iclasını tələb edib.

Sfera.az xarici KİV-ə istinadən xəbər verir ki, bu barədə Rusiyanın BMT-dəki daimi nümayəndəsinin birinci müavini Dmitri Polyanski öz “Telegram” kanalında yazıb.

“Biz bu məsələyə dair bağlı qapılar arxasında keçiriləcək görüş tələb etmişik. Bundan sonra jurnalistlərlə danışmağı planlaşdırırıq", - müavin qeyd edib.

Polyanski həmçinin qeyd edib ki, Danimarka və İsveç araşdırmaları Rusiyanı qane etməyib:

"Danimarka və İsveç araşdırmalarını başa vurduqdan sonra aydın oldu ki, onlar yalnız vaxt qazanmağa və bu terror hücumunda əsas şübhəlini xilas etməyə çalışırlar".

Xatırladaq ki, 27 sentyabr 2022-ci ildə “Nord Stream AG” şirkəti  “Şimal axını” qaz kəmərinin üç xəttinə dəyən ziyanın fiziki zədə nəticəsində olduğunu bildirilib.  Hadisədən sonra Rusiya Baş Prokurorluğu beynəlxalq terrorizm ittihamı ilə iş açıb. Bundan sonra Almaniya, Danimarka və İsveç araşdırma başladıb.

8 fevral 2023-cü ildə ABŞ-nin tədqiqatçı jurnalisti və “Pulitzer” mükafatı laureatı Seymur Herş anonim mənbələrə istinadən məsələ ilə bağlı  ABŞ-ni ittiham edən məqalə dərc edib. İddiaya görə, 2022-ci ilin iyununda ABŞ Hərbi Dəniz Qüvvələrinin dalğıcları “BALTOPS” təlimi altında “Şimal axını 1” və “Şimal axını 2” qaz kəmərlərinin altına partlayıcı qurğular yerləşdirib və norveçlilər üç ay sonra bombaları işə salıblar.Daha sonra “The New York Times” ABŞ rəsmilərinə istinadən bildirib ki, qaz kəmərlərində təxribat aktı müstəqil fəaliyyət göstərən “Ukraynayönlü qrup” tərəfindən törədilib.

Firuzə Əliyeva