Putin bu gün Rusiya xalqına MÜRACİƏT EDƏCƏK

Vladimir Putin bu gün Rusiya xalqına müraciət edəcək.

Sfera.az xəbər verir ki, müraciətin əsas mövzuları  ənənəvi olaraq əvvəlcədən ictimaiyyətə açıqlanmayıb. 

Bununla belə, Putin bildirib ki, daxili siyasi təqvimi nəzərə alaraq qarşıdakı altı il üçün əsas vəzifələri müəyyənləşdirəcək.

Dmitri Peskovun sözlərinə görə, Putin müraciətin mətni üzərində şəxsən işləyib. Dövlət başçısı nazirlər, baş nazirin müavinləri və digər hökumət rəsmiləri ilə telefonla və üzbəüz əlaqə saxlayıb. Müraciət federal televiziya kanallarında və böyük şəhərlərdə açıq ekranlarda canlı yayımlanacaq.

Müraciət mərasiminə 1000-ə yaxın insan dəvət olunub. Onların arasında Rusiya parlamentinin hər iki palatasının üzvləri, hökumət və prezident administrasiyasının rəsmiləri, Konstitusiya və Ali Məhkəmə rəhbərlikləri, Dövlət Şurasının və İctimai Palatanın üzvləri, qubernatorlar, dini qurumların nümayəndələri, diplomatlar, jurnalistlər, xüsusi hərbi əməliyyatın iştirakçıları var.

Qeyd edək ki, Rusiya tarixində xalqa ən uzun müraciət (115 dəqiqə) 2018-ci ildə Putin tərəfindən edilib. Putinin müraciətləri orta hesabla 70 dəqiqə davam edib. Ən qısa müraciətlər isə 2004 və 2005-ci illərdə edilib, hər ikisi 48 dəqiqə davam edib.

Firuzə Əliyeva