ABŞ Prezidenti Co Bayden Ukraynaya yardımı sürətləndirmək üçün çərşənbə axşamı Ağ Evdə Nümayəndələr Palatasının spikeri Mayk Conson da daxil olmaqla konqres liderləri ilə görüşəcək. 

Sfera.az “Bloomberg”ə istinadən xəbər verir ki, görüşün məqsədi müttəfiqlərə, o cümlədən Ukraynaya zəruri olan maliyyə yardımını ayırmaqdır. 

Xatırladaq ki, ABŞ Konqresi 2023-cü ilin oktyabrından bəri prezident Co Bayden administrasiyasının Ukraynaya təxminən 60 milyard dollar məbləğində əlavə yardım tələbinin təsdiqini yekunlaşdıra bilmir. Nümayəndələr Palatasının spikeri Mayk Conson bu qanun layihəsini səsverməyə çıxarmayıb. Sədr səsverməni fevralın sonuna qədər təxirə salıb. Bayden Ukraynaya yardımı müzakirə etmək üçün Consonla görüşməyə hazır olduğunu bəyan edib. Bu baxımdan sabahkı görüş Ukraynaya maliyyə yardımının ayrılması baxımından əhəmiyyətlidir. 

Qeyd edək ki, nəzərdə tutulan 60 milyard dollarlıq vəsaitin böyük hissəsi Ukraynanın silah təchizatı üçün istifadə ediləcək. 

Vasif