Rusiyalı müxalifətçi Aleksey Navalnının cəsədinin ailəsinə təhvil verilməməsi müzakirə obyekti olaraq qalır. Qeyd olunur ki, Navalnının ölümündən sonra Rusiya Prezidenti Vladimir Putin Cəzaların İcrası üzrə Federal Xidmətin (FSİN) rəhbərliyini mükafatlandırıb. O cümlədən, xidmətin iki direktor müavini və iki idarə rəisinin rütbələri yüksəldilib.

Rusiya müxalifətçilərinin iddiasına görə, sözügedən direktor müavinlərindən biri Navalnıya işgəncələr verdirən Valeri Boyarinevdir.

Sfera.az-a bununla bağlı fikirlərini bölüşən siyasi şərhçi Şahin Cəfərli deyib ki, Navalnının Münhen Təhlükəsizlik Konfransının başladığı gün öldürülməsi təsadüf deyil.

“Putin bütün addımları ilə həm ölkə daxilinə, həm də dünyaya deyir ki, Navalnı məhz onun əmri ilə öldürülüb. O, bu davranışı ilə dövlətə nə dərəcədə hakimliyini, Rusiyada tək güc mərkəzinin özü oduğunu, ehtiyac duyarsa, başqa radikal qərarlar da verib, icra etdirə biləcəyini nümayiş etdirmək istəyir. Məsələn, nüvə silahının tətbiqi də bu sırada yer ala bilər”.

Ekspert xatırladıb ki, artıq beş gündən çoxdur, Navalnının meyiti ailəsinə verilmir:

“Rejim yəqin ki, dəfn mərasiminə arzuolunmaz sayda insanın toplaşmasından ehtiyatlanır”.

Xatırladaq ki, rusiyalı müxalifət lideri Aleksey Navalnı fevralın 16-da Rusiya koloniyalarından birində dünyasını dəyişib. Federal Penitensiar Xidmətin regional şöbəsi siyasətçinin gəzintidən dərhal sonra xəstələnib, huşunu itirdiyini bildirib. Fevralın 19-da müxalifətçinin həyat yoldaşı Yuliya Navalnaya ərinin işini davam etdirəcəyini bildirib və rusları “rejimlə mübarizəyə” çağırıb.

Günay