“Ermənilərin təxribatları cavabsız qalmır” - ŞƏRH

Ermənistan Silahlı Qüvvələrinin Qafan rayonunun Nerkin-And yaşayış məntəqəsi istiqamətində yerləşən mövqeyindən açılan atəş nəticəsində azərbaycanlı hərbi qulluqçunun yaralanması hadisəsinə cavab tədbirlərinin görülməsi təbii haldır. Azərbaycan Ordusunun qarşı tərəfin təxribat məntəqələrini zərərsizləşdirməsi zəruri idi.

Sfera.az xəbər verir ki, bu barədə fikirləri Sosial Rifah və Tədqiqatlar İctimai Birliyinin sədri Əkrəm Baydəmirli bildirib.

“Ermənistan hakimiyyəti anlamalıdır ki, təxribat xarakterli addımları mütləq cavablandırılacaq. Uzun illər davam edən cəzasızlıq mühiti, dinc insanların həyatına qəsd etmə halları, 2020-ci ilin 27 sentyabrından sonra dəyişib. Beynəlxalq hüquq və ölkələrin imzaladığı konvensiyalarda da təsbit olunur ki, hər bir ölkə öz suveren ərazisində təhlükəsizliyi təmin etməlidir. O baxımdan Azərbaycan sərhədinə, əsgərinə qəsd olursa, bu, dərhal adekvat cavablandırılmalı idi. Ermənistan da, onu dəstəkləyənlər də birdəfəlik anlamalıdırlar ki, Azərbaycan təxribatları cavabsız qoymur. Digər sual doğuran məqam odur ki, Ermənistanla Azərbaycan arasında müşahidə aparan Avropa Birliyinin missiyası erməni hərbçilərinin təxribatlarına niyə reaksiya verməyib?”

Əkrəm Baydəmirli qeyd edib ki, onların hansı missiya ilə regiona gəldiyi bəllidir.

“Avropa Birliyinin müşahidə aparan nümayəndələrinin məqsədi gerçəkdən sülhə töhfə verməkdirsə, sərhəddə baş verən erməni təxribatına münasibət bildirməlidirlər. Həmçinin, Ermənistan tərəfi əgər müharibə istəmirsə, hərbçilərinin törətdiyi təxribata aydınlıq gətirməlidir”.

Ülkər Abdurahmanlı