Rusiya tərəfindən təklif edilən "Türkiyədə qaz qovşağı layihəsi"nin yol xəritəsi Rusiya Prezidenti Vladimir Putinin respublikaya planlaşdırılan səfəri zamanı müzakirə olunacaq. 

Sfera.az xəbər verir ki, bu barədə "RİA Novosti"yə Türkiyə prezident administrasiyasındakı mənbə bildirib.

Bundan əvvəl məlum olmuşdu ki, Türkiyə nümayəndə heyəti qaz qovşağının təfərrüatlarını müzakirə etmək üçün Rusiyaya səfər edib. Tərəflər tədbirlər təqvimi hazırlayaraq işləri sürətləndirmək qərarına gəliblər.

Agentliyin həmsöhbəti bildirib ki, bu layihə Rusiya və Türkiyə prezidentləri arasında gələcək danışıqların gündəminin əsas bəndlərindən biridir. Görüş zamanı liderlər öz tapşırıqlarını verəcəklər.

Putinin Türkiyəyə səfərinin dəqiq tarixi isə hələ açıqlanmayıb.

Xatırladaq ki, 2022-ci ilin sentyabrında “Şimal axını” və “Şimal axını 2” qaz kəmərlərində baş verən terror aktından sonra Vladimir Putin Rusiya qazının itirilmiş tranzit həcminin Qara dəniz regionuna köçürülməsini təklif edib. Onun sözlərinə görə, Türkiyədə qaz qovşağı yaratmaq olar. Bu da digər ölkələrə tədarük platformasına çevrilə bilər.

Bir müddət əvvəl isə Türkiyənin Putinin səfəri zamanı qaz məsələsi, AES layihəsi və Suriyanı müzakirə etmək istədiyi bildirilib.

Əzizə Zeynal