Ukrayna lideri Volodimir Zelenskinin Almaniyanın ARD telekanalına müsahibəsində səsləndirdiyi fikirlər gündəm olub. O, Kiyevin çətin vəziyyətdə olduğunu deyib.

“Avropa təkbaşına nə silah, nə də maddi cəhətdən Ukraynanın əvvəllər aldığı dəstəyin öhdəsindən gələ bilər. ABŞ yardımının gecikdirilməsi artıq bəzi AB liderlərinə də təsir edir. Əgər son nəticədə yardım göstərilməsə və Rusiya Ukraynada irəliləsə, Avropa və NATO-da parçalanma baş verə bilər”, - Zelenski əlavə edib.

Maraqlıdır, NATO-nun parçalanması müzakirə obyekti ola bilərmi?

Mövzu ilə bağlı Sfera.az-a açıqlama verən Beynəlxalq Münasibətlər və Diplomatiya Araşdırmaları Mərkəzinin sədri Samir Hümbətov bildirib ki, Zelenski bu açıqlaması ilə Qərb dövlətlərinə xəbərdarlıq edir:

“Ukrayna liderinin son müsahibəsindən onun ABŞ və NATO-dan daha çox dəstək istədiyini anlamaq olar. Eyni zamanda, Zelenski Qərbə xəbərdarlıq edir ki, əgər siz mənə dəstəyinizi davam etdirməsəniz və Rusiya Ukrayna ərazisinin böyük hissəsini işğal edərsə, növbə NATO ölkələrinə çatacaq. Rusiya Ukrayna ilə kifayətlənməyib Baltikyanı ölkələr, Moldova, Polşa və digərlərinə keçəcək. Bu da NATO-nun dağılmasına gətirib çıxara bilər”. 

Siyasi şərhçinin sözlərinə görə, hadisələr göstərir ki, Qərbin Ukraynaya yardımları artacaq:

“Bir neçə gün öncə İngiltərə ilə Ukrayna arasında müdafiə sahəsində əməkdaşlığın gücləndirilməsi və dərinləşdirilməsi ilə bağlı müqavilə imzalandı. Məqsəd Böyük Britaniyanın bütün imkanlarından istifadə edərək Kiyevə yardımların artırılmasıdır. Əgər bu reallaşarsa,  ABŞ-nin də oxşar addımı atmaq ehtimalı böyükdür”.

Politoloq sonda vurğulayıb ki, NATO-nun parçalanmasının yaxın dövrdə mümkün olacağı görünmür:

“Uzun illər ərzində ABŞ-nin NATO-ya xərclədiyi pulların da məqsədi məhz NATO-nu ayaqda tutmaqdır. Bu səbəbdən NATO-nun hələ ki, parçalanma ehtimalı azdır. Bununla paralel, Ukrayna NATO-ya daxil olmasa belə, əlaqələri başqa formada davam etdirəcək. Ukraynanın həm ABŞ, həm də Avropa İttifaqından yardım ala biləcəyini düşünürəm”. 

Firuzə Əliyeva