Fransa yalnız Makrondan və onun kimilərdən ibarət deyil. Fransa Senatının, ümumilikdə bu ölkənin rəsmilərinin anti-Azərbaycan mövqeyi anlaşılan deyil. Artıq müharibə bitib, Azərbaycanla Ermənistan arasında sülh müqaviləsinin imzalanması ilə bağlı müzakirələr gedir. Bir sözlə regionda uzunmüddətli sabitliyi təmin etmək üçün şəraitin yetişdiyi məqamda, Fransa rəsmiləri yaxalarını cıraraq münaqişəni yenidən alovlandırmağa çalışır.

Sfera.az xəbər verir ki, bu barədə fikirləri Sosial Rifah və Tədqiqatlar İctimai Birliyinin sədri Əkrəm Baydəmirli bildirib. Onun sözlərinə görə, adıçəkilən ölkədə erməni lobbisi, diasporu çox güclüdür:

“Həmin qüvvələrin maliyyəsi ilə işləyən fransız deputatlar və dövlət rəsmiləri var. Amma, bütün bunlar Fransanın anti-Azərbaycan mövqeyində olmasına əsas ola bilməz. Digər tərəfdən ermənipərəst xarakterlə Cənubi Qafqazda uğur qazanmaq mümkün deyil. Geosiyasi proseslər dəyişdikcə Fransanın mahiyyəti ortalığa çıxır. Əslində, belə ziddiyyətli siyasət, çağdaş dünyanın hüquq sistemini zədələyir. Prezident Makron Fransanın xarici siyasət strategiyasını çökdürməkdə davam edir”.

Əkrəm Baydəmirli bildirib ki, Fransanın da hadisələri düzgün dəyərləndirən siyasi elitası mövcuddur. “Görünür, onlarla işləmək, əsl reallığı geniş auditoriyalara çatdırmaq zərurəti yaranıb. Reallıq onu göstərir ki, sərt bəyanatlar lazımdır. Amma bu bəyanatlar yetərli deyil. Deməli, problemlərin çözülməsi üçün həm Fransada beynəlxalq münasibətləri düzgün dəyərləndirən siyasi elita ilə, həm də Avropa Şurası Parlament Assambleyasının bir sıra ölkələrdən olan nümayəndələri ilə intensiv danışıqlar aparmaq vacibdir”.

Ülkər Abdurahmanlı

“Fransız deputatlar erməni maliyyəsi ilə işləyir” - AÇIQLAMA