"Gecikmiş yardım paketləri, Trampın hakimiyyətə qayıdışı..." - Ukrayna savaşının nəticəsi ilə bağlı ÜÇ SSENARİ
“Ukrayna-Rusiya münaqişənin üç mümkün nəticəsi ola bilər”.
Sfera.az bildirir ki, bunu İsveç Müdafiə Araşdırmaları Agentliyinin tədqiqat direktoru Robert Furter deyib.
Onun sözlərinə görə, ya tərəflərdən biri qalib gələcək ya da savaş nəticəsiz qalacaq:
“Ötən yay Ukrayna əks-hücumu uğursuz oldu. Qərbin Kiyevə dəstəyi azaldı. Bu amillər nəzərə alınarsa, Rusiyanın qələbəsi daha inandırıcı görünür. Kremlin bu münaqişədə əsas qələbə şansı mübarizəni davam etdirmək istəyi və Qərbin yorulması, Ukraynanın enerjisinin tükənməsindən asılıdır. Həmçinin, Avropa İttifaqı və ABŞ Konqresinin gecikmiş yardım paketləri, Donald Trampın hakimiyyətə qayıdışı perspektivi və döyüşlərə görə Ukrayna daxilində parçalanma əlamətlərinin artması kimi hallar da Kreml üçün ümidvericidir”.
Tədqiqatçı Ukraynanın qələbə ehtimalından da söz açıb:
“Ukraynanın Rusiyaya hərbi və ya siyasi zərbəsi aydındır. Lakin bunun nə qədər ağır olub-olmaması önəmlidir. Kiyevin qələbəsi indi daha uzaq bir ehtimal kimi görünür. Rusiyanın cənubda və şərqdə müdafiəsi davam edir, Kreml daha çox qoşun və texnikanı səfərbər edə bilib, neft ixracı hesabına iqtisadiyyatını bərpa edib”.
R.Furter bildirib ki, hazırkı vəziyyətdə üçüncü ssenari daha mümkün görünür:
“Yəni, heç-heçə...Əlbəttə, tərəflərin müzakirələr yolu ilə təmin olunan bir fasiləyə ehtiyacı olacaq. Ukraynanın işğal olunmuş ərazilərin itirilməsini qəbul edəcəyi sabit və davamlı sülh qeyri-mümkün görünür”.
Günay
