Xəbər verdiyimiz kimi, bu gün Azərbaycan Avropa Şurası Parlament Assambleyası (AŞPA) ilə əməkdaşlığını dayandırıb. Buna səbəb AŞPA-nın Azərbaycana qarşı qərəzli Qətnamə qəbul etməsi olub. Qətnamədəki məsələlərdən biri Azərbaycanın keçirdiyi antiterror əməliyyatları nəticəsində "ermənilərin qaçqın düşməsi" ilə bağlı iddiadır. Əslində isə Azərbaycan Qarabağ ermənilərini qovmayıb, hətta onların reinteqrasiyası üçün çalışıb, lakin ermənilər Azərbaycan vətəndaşı olmaq istəmədikləri üçün könüllü şəkildə Qarabağı tərk ediblər. Bu zaman da onlara qarşı heç bir qeyri-insanı davranış sərgilənməyib. 

AŞPA-nın qərəzli qətnaməsi 76 lehinə, 10 əleyhinə və 4 bitərəf səs olmaqla qəbul edilib. Azərbaycanın əleyhinə səs verən dövlətlər arasında Ermənistan da var. Bu da Ermənistanın qətnamədəki “Dağlıq Qarabağda humanitar vəziyyət” bəndini də qəbul etdiyi mənasını verir.

Bəs Ermənistanın bu mövqeyi sülh sazişinin bağlanmasına necə təsir edəcək?

Məsələ ilə bağlı Sfera.az-a açıqlama verən REAL partiyasının icra katibi Natiq Cəfərli bildirib ki, AŞPA-nın Azərbaycan-Ermənistan məsələsi ilə bağlı münasibəti təmamilə qəbuledilməzdir:

"Qətnamədə Laçın dəhzili və ermənilərin, guya, qaçqın düşməsi kimi haqsız iddialar qeyd olunub. Bu, Azərbaycan-Ermənistan münasibətlərinə də böyük zərbə vurur. Bu məsələləri həll etməkdənsə, artıq tarixə qovuşmuş "Dağlıq Qarabağ" mövzusunu gündəmə gətirməklə böyük səhv edirlər”. 

Partiya rəsmisi qeyd edib ki, Avropa institutları sülhün tezliklə bərqərar olması üçün çalışmalı idilər:

“Ukrayna da ərazi bütövlüyü və suverenliyini bərpa etmək üçün mübarizə aparır. Avropa institutları Ukraynaya silah da, vəsait də, siyasi dəstək də verirlər. Azərbaycan isə öz ərazi bütövlüyü və suverenliyini öz hesabına, qurduğu ittifaqlar gücünə bərpa edib. Buna sevinib, dəstək verib, sülh yönümlü addımlar atmaqdansa, haqsız yerə ittihamlar mənasızdır”.

Siyasətçinin fikrincə, bu hadisələr sülhə mane olan prosesə çevrilə bilər:

“Lakin bu, o demək deyil ki, sülh danışıqları təmamilə dayanacaq. Mən əminəm ki, Azərbaycan və Ermənistan müxtəlif platformalarda sülh danışıqlarını davam etdirəcəklər”.

Firuzə Əliyeva