Rusiya Dövlət Dumasının Beynəlxalq Əlaqələr Komitəsi sədrinin birinci müavini Aleksey Çepa Türkiyənin İsveçin NATO-ya üzv olmasına razılıq verməsi barədə danışıb. 

Sfera.az xarici mediaya istinadən xəbər verir ki, Çepa deyib ki, Türkiyə istədiyi hər şeyi əldə edib:

“Biz yalnız bunun baş verdiyinə görə təəssüflənə bilərik. Bir il yarımdan çox Türkiyə razılaşmayaraq, Avropa Birliyində bəzi üstünlüklər istəmişdi. Aydındır ki, o, hər şeyi əldə edib”.

Eyni zamanda, Çepa qeyd edib ki, İsveçin NATO-ya daxil olma vaxtı Şimali Atlantika Alyansı və ölkənin özündən asılıdır.

Qeyd edək ki, yanvarın 23-də Türkiyə parlamenti İsveçin NATO-ya üzv olmaq ərizəsini sadə səs çoxluğu ilə təsdiqləyib. İndi müvafiq fərman imzalanmaq üçün Türkiyə Prezidenti Rəcəb Tayyib Ərdoğana təqdim olunacaq.

İsveç Rusiya və Ukrayna arasında hərbi münaqişənin başlanması fonunda 2022-ci ildə Finlandiya ilə birlikdə NATO-ya daxil olmaq üçün ərizə təqdim edib.

Əvvəlcə Türkiyə İsveçin NATO-ya daxil olmasına qarşı çıxıb. Buna səbəb Stokholmdakı Türkiyə səfirliyi yaxınlığında etirazçıların Quran nüsxəsini yandırdıqları etiraz aksiyası olub.

Əzizə Zeynal