Rəisinin Türkiyəyə GÖZLƏNİLƏN SƏFƏRİ: Ərdoğana nələr deyəcək?

İran prezidenti İbrahim Rəisi bu gün Türkiyəyə gedəcək. Dövlət başçıları Qəzzada atəşkəsə nail olmaq və girovların azad edilməsi üçün atılacaq addımları müzakirə edəcəklər.

Bundan əvvəl, Rəisinin Ankaraya səfəri İranın Kirman şəhərindəki terror aktı ilə əlaqədar təxirə salınmışdı.

Maraqlıdır, uzun müddətdir gözlənilən səfərin nəticəsi necə olacaq?

Bununla bağlı Sfera.az-a açıqlama verən siyasi şərhçi Kənan Novruzov deyib ki, İran və Türkiyə liderlərinin görüşünə mane olmaq istəyənlər var və bu, xüsusilə ABŞ ola bilər:

“Vaşinqton bütün imkanları ilə Tehranı idarə olunan vəziyyətə gətirmək istəyir. Bunun əsas səbəblərindən biri İranın nüvə silahı əldə etmək istiqamətində irəliləməsidir. Belə olan halda, Tehranla Ankara arasında əlaqələr Vaşinqtonun maraqlarına cavab vermir. Çünki ABŞ-lə Türkiyə arasında son vaxtlar ziddiyətlər olmasına baxmayaraq, hər iki dövlətin NATO üzvü olması reallıqdır. Üstəgəl, İranla Türkiyənin normal münasibətləri var. Hər iki dövlət eyni regionda yerləşir və müsəlman dövlətidir. Bu isə o deməkdir ki, Türkiyə gələcəkdə ABŞ-nin İranla bağlı planlarına mane ola bilər”.

Müsahibimiz bildirib ki, Rəisinin bu günkü səfərində əsas müzakirə mövzusu məhz Qəzzadakı mövcud vəziyyət olacaq:

“Onlar İsrailə qarşı mövqelərini açıq ifadə edəcəklər. Yəqin ki, hər iki lider, müharibənin ən yaxın vaxtda bitməsində maraqlı olduğunu deyəcək. Əlbəttə, liderlər həm də digər regional məsələlər barədə danışacaqlar. Həmçinin Cənubi Qafqazdakı son durumun, o cümlədən Azərbaycanla Ermənistan arasında normallaşma əlaqələrinin müzakirə olunması mümkündür. Düşünürəm ki, səfər konstruktiv mühitdə keçəcək və tərəflərin gələcək əməkdaşlığı üçün təkan olacaq”.

Günay