Fransa Parlamentinin və Avropa Parlamentinin Azərbaycanın əleyhinə qəbul etdiyi sənədlərə Avropa Şurası Parlament Assembleyası da qoşulmaq istəyir.

Sfera.az xəbər verir ki, bu barədə fikirləri politoloq Elxan Şahinoğlu bildirib.

"Avropa Şurası Parlament Assembleyası(AŞPA) “Dağlıq Qarabağla” bağlı qəbul etdiyi qətnamədə Azərbaycan hakimiyyətinə Qarabağdan olan ermənilərin bölgəyə qayıda bilməsi üçün “etimad mühiti və maddi şərait yaratmaqla bağlı” çağırış edib. AŞPA bundan başqa, “ermənilərin hüquq və azadlıqlarının müdafiəsi və gücləndirilməsi üçün nəzərdə tutulan tədbirlər haqqında tam və ətraflı məlumat verməyi” Azərbaycandan xahiş edib”.

Politoloq bildirib ki, Azərbaycan Xarici İşlər Nazirliyi isə Avropa Şurası Parlament Assambleyasının Qarabağla bağlı qətnaməsini və tövsiyəsini rədd etdiyini və şiddətlə qınadığını bildirən bəyanat yayıb.

“Bəyanatda AŞPA-nın Azərbaycana münasibətdə növbəti dəfə qərəzsiz yanaşma nümayiş etdirmək imkanına malik olmadığı göstərilib. Azərbaycan Qarabağ ermənilərinə Azərbaycan qanunvericiliyi və hakimiyyəti çərçivəsində hüquqlar və təhlükəsizlik vədi verib. Buna baxmayaraq, Azərbaycanın atdığı bu addımların heç biri AŞPA-nın sənədlərində qeyd edilməyib. Bu da Azərbaycana olan qərəzli yanaşmanın sübutudur”.

Ülkər Abdurahmanlı