Rusiyanın xarici işlər naziri Sergey Lavrov ABŞ-nin Nyu-York şəhərinə gedib. O, BMT Təhlükəsizlik Şurasının Yaxın Şərqdəki vəziyyətə, o cümlədən Fələstin məsələsinə dair rüblük açıq debatlarında, həmçinin Rusiyanın təşəbbüsü ilə Ukrayna məsələlərinə dair iclasda iştirak edəcək.

Bununla bağlı Sfera.az-a açıqlama verən Beynəlxalq Münasibətlər və Diplomatiya Araşdırmaları Mərkəzinin sədri Samir Hümbətov deyib ki, Lavrovun iclasda iştirak üçün getməsinin arxasında duran ən başlıca səbəblərdən biri son dövrlərdə Ukrayna cəbhəsində vəziyyətin xeyli dəyişməsidir:

“Rusiya mediasına əsasən, Kreml irəliləyir. Lakin Qərb mediası Rusiyanın müqavimətinin qırıldığını yazır. Əslində bu, informasiya savaşıdır. Amma Lavrov bu reallığı bilir. O, çox yaxşı başa düşür ki, ölkəsi Ukrayna cəbhəsində irəliləyə bilmir. Digər tərəfdən, oktyabrın 7-də HƏMAS-ın İsrailə qarşı başlatdığı hərəkatla Rusiya Yaxın Şərqdə yeni cəbhə açmış oldu. Rusiya bir növ ABŞ-nin oyununa cavab vermək üçün “cəbhəyə qarşı cəbhə” üsulu seçib. Görünür, Ukrayna ilə bərabər Fələstinin müstəqil dövlət olmaq məsələsinin gündəmə gələcək və bunu Moskvanın Qərbə resti kimi dəyərləndirmək olar. Yəni, “Ukrayna məsələsində geri addım atmasanız, biz də Fələstinin müstəqilliyini istəyəcəyik”...”

Müsahibimiz bildirib, Ukraynaya Qərbin dəstəyi əsas müzakirə obyektidir: “Qərb ölkələrinin dayanmayacağı da Rusiyaya bəllidir. Ukraynanın uduzması, Rusiyanın əlini çox möhkəmləndirəcək. Kreml isə bununla kifayətlənməyəcək, Moldovanı, Gürcüstanı, Qazaxıstanı, digər Baltikyanı ölkələri öz təsir altına almağa çalışacaq. Hətta bu hərəkatı Polşaya qədər davam etdirə bilər. Həmçinin, Rusiya iclasda Ukraynaya yardımların dayandırılmasını tələb edəcək. Bu isə nə Kiyevə, nə də Qərbə sərf etmir. Müharibənin uzanması ümumilikdə Qərbin xeyrinə olan prosesdir. Diplomatiyada isə hətta müharibə vəziyyətində olan dövlətlərdə belə münasibətlər tükənmir. Ona görə bu proses davam edə bilər. Yəni, Lavrovun ABŞ rəsmiləri və digər nümayəndələrlə görüşməsi mümkündür”.

Günay