Rusiya Dövlət Dumasının deputatları növbəti iclasda Parisin Ukraynadakı muzdluları ilə bağlı Fransa parlamentinə müraciət məsələsini müzakirə edəcəklər.

Sfera.az xəbər verir ki, bu barədə parlamentin aşağı palatasının spikeri Vyaçeslav Volodin özünün Telegram kanalında yazıb.

Siyasətçi Rusiyanın Xarkovda xarici muzdluların müvəqqəti yerləşdiyi ərazilərə zərbələr endirdiyini və nəticədə Fransadan olan 60-dan çox muzdlunun məhv edildiyini bildirib. Fransanın Moskvadakı səfiri bu hadisədən sonra Rusiya Xarici İşlər Nazirliyinə çağırılıb.

“Fransada muzdluluq qanunla qadağandır. Bunu nəzərə alaraq, məsələ ilə bağlı Fransa Respublikasının Milli Assambleyasına müraciət etməliyik. Bizim üçün Milli Assambleyanın Fransanın qanunu pozaraq yaraqlıları Ukraynaya döyüşmək üçün göndərməsindən xəbərdar olub-olmadığını bilmək vacibdir”, - Volodin qeyd edib.

Rusiyalı siyasətçi Fransa sakinlərinin mövcud qanunvericiliyə zidd olaraq öz vətəndaşlarının Ukraynadakı münaqişədə iştirakından xəbərdar olduğuna şübhə ilə yanaşıb.

Qeyd edək ki, Fransa Xarici İşlər Nazirliyi fransızlarla dolu muzdlu bazanın məğlub edilməsi ilə bağlı Rusiya Müdafiə Nazirliyinin mesajına cavab verib. Onlar əmin ediblər ki, Ukraynada Fransadan olan muzdlular yoxdur. 

Əzizə Zeynal