Türkiyənin nəqliyyat və infrastruktur naziri Abdulkadir Uraloğlu ölkəsini türk dünyası ilə birləşdirəcək Zəngəzur dəhlizi layihəsinin 2028-ci ildə həyata keçirilə biləcəyini bildirib. O, bu barədə “Tvnet”ə müsahibəsində danışıb. “Qarşıdakı 5 ildə dəhlizlə bağlı işlər davam edəcək. Son vaxtlar bu məsələdə Ermənistandan da müsbət mesajlar var. Dəhlizin 43 kilometrlik hissəsi Ermənistan ərazisindədir. Oranın planlaşdırılması da başa çatanda məsələ həllini tapmış olacaq. Beləliklə, biz türk dünyasına daha rahat çata biləcəyik”.

Bununla bağlı Sfera.az-a açıqlama verən siyasi şərhçi Kənan Novruzov deyib ki,  Zəngəzur dəhlizinin açılması həm siyasi, iqtisadi, həm də təhlükəsizlik baxımından əhəmiyyətlidir:

“Hər şeydən əvvəl Cənubi Qafqaz regionunda əməkdaşlıq mühitinin təmin olunması üçün münbit şərait yaranacaq. O cümlədən, türk dünyasının birləşməsinə təkan veriləcək, Avropa ilə ticarət əlaqələri güclənəcək. Son vaxtlaradək Zəngəzur dəhlizinin açılmasına mane olan əsas məqam Ermənistanın destruktiv mövqeyi idi. Amma xüsusilə, Bakı və İrəvan arasında münasibətlərin normallaşması fonunda qarşı tərəfin ritorikasında yumşalmalar var”.

Müsahibimiz bildirib ki, İrəvan Zəngəzur dəhlizinin açılmasına birdən-birə razı olmayacaq:

“Ermənistan prosesi mümkün qədər uzatmağa çalışacaq. Həmçinin Tehran da hələ bu məsələdə birmənalı mövqe ortaya qoyub. Amma Azərbaycan və Türkiyə Zəngəzur dəhlizinin açılmasında maraqlıdır. Əlbəttə, Zəngəzur dəhlizi açılacaq, bunun alternativi yoxdur. Türkiyəli nazirin proqnozu gerçəkləşər və 2028-ci ildə Zəngəzur dəhlizi layihəsi tamamilə həyata keçirilərsə, onda dünyanın geosiyasi konyunkturasında tamamilə yeni mənzərə yaranacaq”.

Günay