“Fransanın regionda Ermənistan vasitəsilə güclənmək cəhdləri faydasızdır” – Politoloq

“Fransa ilə Azərbaycan arasında siyasi-diplomatik böhran davam edir. Rəsmi Bakı Fransanın iki diplomatını "arzuolunmaz şəxs" elan etdikdən sonra rəsmi Paris qarşılıqlı olaraq iki Azərbaycan diplomatından ölkəni tərk etməyi tələb edib”.

Sfera.az xəbər verir ki, bunu politoloq Məhəmməd Əsədullazadə deyib.

Onun sözlərinə görə, Parisin Ermənistan vasitəsilə regionda öz geosiyasi mövqelərini gücləndirmək cəhdləri müsbət nəticə verməyəcək:

“Çünki regionda Türkiyə ilə yanaşı Fransanın əzəli rəqibi olan Böyük Britaniya da var. Ona görə də Parisin həyata keçirdiyi siyasət öz əleyhinə çevrilir. Fransa ilə Azərbaycan arasında siyasi münasibətlərdə ziddiyətlərin davam etməsi gözlənilir. Fransa məhz "Zəngəzur dəhlizi”nə nəzarəti əldə etməyə və Türkiyənin regiondakı mövqeyini zəiflətməyə çalışır”.

Politoloq qeyd edib ki, Paris Türkiyə -Böyük Britaniya və Azərbaycan üçtərəfli geosiyasi layihəsinə qarşı hərəkətə keçib və Cənubi Qafqaz və Mərkəzi Asiyada orta dəhlizə nəzarəti ələ keçirməyi planlaşdırır:

“Məhz Türkiyə və Böyük Britaniya Fransanın bu siyasətinin qarşısını almaq iqtidarındadır”.

Ülkər Abdurahmanlı