“Ermənistan-İran əlaqələrində yeni böhran başlaya bilər”.

Bunu Sfera.az-a açıqlamasında politoloq Məhəmməd Əsədullazadə deyib.

Onun sözlərinə görə, buna səbəb İrəvanın qərbyönümlü siyasətidir. Ekspert İran xarici işlər naziri Hüseyn Abdullahianın Ermənistana səfər etdiyini də xatırladıb:

“Moskva və Tehran regionda ABŞ və Avropa İttifaqının geosiyasi mövqelərini gücləndirməsindən narahatdır. Bir neçə gün bundan əvvəl Nikol Paşinyanla İran Prezidenti İbrahim Rəisi arasında telefon danışığı baş tutmuşdu. İstisna deyil ki, Rəisi erməni həmkarına qərbyönümlü siyasətlə bağlı narahatlığını çatdırıb. Fikrimcə, Ermənistan və İran arasında siyasi problemlər yeni müstəvidə davam edəcək”.

Politoloq qeyd edib ki, İran Ermənistanın yürütdüyü siyasətdən narazıdır:

“Lakin Paşinyan İran və Rusiyanın təzyiqlərinə rəğmən, Qərblə əməkdaşlığı davam etdirəcək. Belə davam edəcəyi təqdirdə isə Moskva və Tehran Ermənistan hakimiyyətini cəzalandırmaq siyasətinə əl ata bilər”.

Qeyd edək ki, dünən Ermənistan və İranın XİN rəhbərləri Ararat Mirzoyanla Hüseyn Əmir Abdullahian arasında görüş keçirilib. Nazirlər həm təkbətək, həm də geniş tərkibdə danışıqlar aparıblar.

Günay