“Qürurverici anlar idi” – Deputat Xankəndidə baş tutan matçdan DANIŞDI

“Dekabrın 21-də işğaldan azad olunmuş Xankəndi şəhərində keçirilən futbol matçı çox tarixi bir oyun idi. Çünki, 30 ildən çox idi, həmin yerlərə əsil sahiblərinin ayağı dəymirdi. Bu, 30 illik fasilədən sonra Qarabağ bölgəsinin işğaldan azad edilən hissəsində ilk rəsmi matç idi”.

Sfera.az xəbər verir ki, bu fikirləri Milli Məclisin deputatı Ceyhun Məmmədov deyib.

Onun sözlərinə görə, Xankəndi şəhər stadionunda keçirilən qarşılaşma hər bir azərbaycanlının arzusu idi.

“Biz Xankəndidə təkcə tarixi oyunun deyil, həm də böyük bayram əhval ruhiyyəsinin şahidi olduq. Bir zamanlar həmin stadiondan “Qarabağ Ermənistandır” ifadəsinə cənab Ali Baş Komandan elə həmin stadionda topa toxunduğu zərbə ilə cavab verdi. Bu toxunuşla Müzəffər Ali Baş Komandan bütün populist çıxışların layiqli cavabını vermiş oldu. Artıq Xankəndidə separatçılar yox, bu torpağın sahibləri var. Hər zaman Xankəndi və Qarabağdan xəbərlər verən erməni saytları isə bu tarixi oyunun xəbərini gizlətməyə çalışdı”.

Deputat bildirib ki, oyundan öncə komandaların meydana şəhid övladları ilə birlikdə çıxması, daha sonra Dövlət Himnimizin səsləndirilməsi, ardınca isə Azərbaycanın ərazi bütövlüyü və suverenliyi uğrunda şəhid olanların əziz xatirəsinin bir dəqiqəlik sükutla yad edilməsi, cənab Ali Baş Komandanımızın möhtəşəm çıxışı və tribunaların 3 rəngli şanlı al bayraqlarımızla bəzənməsi çox qürurverici anlar idi:

“Xankəndi şəhərində keçirilən futbol oyunu tarixdə silinməz iz qoydu .Bu şəhər qədim Azərbaycan diyarıdır. Şanlı Azərbaycan Ordusu düşmənlərinə və bütün dünyaya sübut etdi ki, Qarabağ bizim tarixi, əzəli torpağımızdır. Bu torpaqların sahibləri Azərbaycan xalqıdır. Üç ay bundan əvvəl Xankəndi işğaldan azad edildi. Bu gün bütün Qarabağ bölgəsində Azərbaycan Bayrağı dalğalanır.

Bundan sonra bütün Qarabağ torpaqlarında Azərbaycan Bayrağı əbədi dalğalanacaq. Azərbaycanlılar bu torpaqlarda əbədi yaşayacaq”.

Ülkər Abdurahmanlı