“İran Azərbaycana qarşı informasiya müharibəsini davam etdirir”.

Sfera.az xəbər verir ki, bunu politoloq Məhəmməd Əsədullazadə deyib. Onun sözlərinə görə, İranda İslam İnqilabı Keşikçilər Korpusuna(SEPAH) bağlı sosial şəbəkə kanallarında və digər kütləvi informasiya vasitələrində Azərbaycanın ərazi bütövlüyünü, suverenliyini və dövlət quruluşunu hədəfə alan silsilə verilişlər, analitik yazılar tirajlanmaqda davam edir:

“Azərbaycan Tehran rejiminin israrlarından sonra İranla münasibətləri normallaşdırmaq istiqamətində ciddi addımlar atdı. Zəngəzur dəhlizinin "Araz seqmentinin" İran ərazisindən keçməsini təmin etdi. Dövlətlərarası müqavilələr imzalandı, danışıqlar aparıldı. Amma, Tehranin hakimiyyət strukturlarında bir neçə qurum antiAzərbaycan siyasətini hələ də davam etdirir.

İran Xarici işlər nazirliyi və SEPAH Azərbaycanı hədəfə alan terror təşkilatı təsis edir və onlara bağlı media vasitəsilə hücum siyasətini davam etdirir. Xüsusilə Tehran rejimi Azərbaycan və Ermənistan arasında sülh müqaviləsinin bağlanması istiqamətində atılan addımları narahatlıqla qəbul edir”.

Politoloq bildirib ki, İrandan Azərbaycana qarşı davam edən informasiya təxribatlarının bitəcəyinə inanmır:

“İran rejimi bu vasitə ilə Azərbaycanı təzyiq altında saxlamaq istəyir. İkincisi, təzyiqləri artırmaqla Güney Azərbaycan mövzusunun aktuallaşmasının qarşısını alacağını düşünür”.

Ülkər