Moskvanın \"ofsayt\"a salındığı Qazax görüşündə razılaşma olacaqmı? – “Ermənilər 31 kənd tələb edir”

Azərbaycanın Qazax rayonunun Ermənistanın İcevan rayonu ilə sərhədində Baş nazirin müavini Şahin Mustafayevlə erməni həmkarı Mqer Qriqoryan arasında görüş başlayıb.

Bununla bağlı Sfera.az-a açıqlama verən siyasi şərhçi Asif Nərimanlı qeyd edib ki, nəticənin əvvəlkilərdən fərqli olacağı sual altındadır:

“Azərbaycanla Ermənistan arasında sərhədin hansı xəritələr üzrə müəyyən edilməsinə dair fikir ayrılığı davam edir. İrəvan işğal altında qalan Qazaxın 7 və Kərki kəndinin azad edilməsinə qarşı “erməni kəndləri” iddiasını irəli sürüb. Digər tərəfdən, sərhəd məsələsində hansısa razılaşma, xəritələrin saxlanıldığı Moskvanın prosesə qoşulmasını şərtləndirir. Görüşün Qərb cəbhəsi isə bununla razılaşmayacaq”.

Ekspert Ermənistan parlamentinin spikeri Alen Simonyanın son iddialarını xatırladıb:

“Erməni spiker 8 kəndin qaytarılmasına qarşı bildirib ki, Ermənistanın 31 kəndi ya tamamilə, ya da qismən Azərbaycanın nəzarəti altındadır. İrəvan “31 kənd” dedikdə Başkəndi və müharibədən sonra dövlət sərhədinin bərpası nəticəsində ordumuzun nəzarət zonasına düşən əraziləri nəzərdə tutur. Bu iddia ilə ya 8 kəndin qaytarılmasını arxa plana keçirmək, ya da Başkəndi almaq və ordumuzun sərhədboyu mövqelərindən geri çəkilməsini təmin etmək istəyirlər. Yəni, Azərbaycan və Ermənistanın sərhədlə bağlı gündəliyi fərqlidir”.

Xatırladaq ki, delimitasiya ilə bağlı indiyə qədər 4 görüş keçirilib. Onlardan ikisi sərhəddə - Arazdəyən və Qazaxda, ikisi isə xaricdə - Moskva və Brüsseldə baş tutub.

Günay