Ermənistanın Baş naziri Nikol Paşinyan Azərbaycan Prezidenti İlham Əliyevlə Brüsseldə görüşün təşkili ilə bağlı ilkin razılığın olduğunu deyib.

“Həm biz, həm də Azərbaycan tərəfi Brüsseldə görüşə hazır olduğumuzu bəyan etdik. Bu, tərəflərin sülhə doğru hərəkət etməsi anlamına gəlir. Bu, o deməkdir ki, 2-3 ay ərzində sülh sazişinin imzalanması gözlənilir. Bu ehtimalın reallaşmasını 70 faiz civarında dəyərləndirirəm”, - deyə baş nazir bildirib.

Bununla bağlı Sfera.az-a açıqlama verən Beynəlxalq Münasibətlər və Diplomatiya Araşdırmaları Mərkəzinin sədri Samir Hümbətov deyib ki, Paşinyanın sözügedən çıxışı hansısa güc mərkəzlərinin hesablanmış açıqlamasına oxşayır:

“Yəni hansısa məsələlərdə Ermənistana diktə edən tərəflər sülh müqaviləsinin 70 faiz əsasında imzalanmasını istəyir. Məsələn, müəyyən mövzularda detallar razılaşdırılsa da, qalanları qalıb və Azərbaycanla ortaq dil tapıla bilsə, nəticə mümkün olar. Paşinyanın verdiyi bəyanatın açıqlaması bundan ibarətdir. Hesab edirəm ki, Ermənistan tərəfi ciddi mövqe ortaya qoya bilsə, hətta nəinki 70, sülh müqaviləsinin imzalanma ehtimalı 80-90 faizə qədər qalxa bilər”.

Müsahibimiz bildirib ki, Ermənistanın indiyə qədər ciddi mövqe ortaya qoyduğu görülməyib:

“Sülh prosesi incə məsələdir və onun üzərində ciddi dayanmaq lazımdır. Ermənistan isə bunu etmir.  Paşinyan bir tərəfdən danışıqlara getsə də, digər tərəfdən, sərhəddə atəşkəs pozulur,  etnik təmizləmə, soyqırım, ərazi iddiaları və s ittihamlarla çıxışlar edir, sərsəm açıqlamalar verir. Tərəflər sülhə doğru gedirsə, sakit, razılaşdırılmış ifadələr olmalı, buna adekvat addımlar atılmalıdır. Amma Ermənistan bunu etmir. Ola bilər, Paşinyan qəfil Azərbaycanın şərtləri ilə razılaşdığını da desin. Bu isə çətin məsələdir. Bəllidir ki, Ermənistan daxilində Nikol ciddi təzyiqlərlə üzləşə bilər. Bununla belə, istənilən halda Ermənistan-Azərbaycan arasında sülh müqaviləsi imzalanmalı, münaqişə tamam bitməlidir. Yəqin ki, Azərbaycan prezidentinin son Gürcüstan səfəri  və bu çərçivədə verdiyi bəyanatlar da Paşinyanın fikirlərinə haradasa təsir edib. Apardığım təhlillərə görə, sülh müqaviləsinin imzalanması Gürcüstanda baş verə bilər”.

Günay Rəsulqızı