Rusiya Xarici İşlər Nazirliyi Qarabağdakı sülhməramlıların taleyinin necə olacağını açıqlayıb. 

Sfera.az xəbər bununla bağlı Rusiya xarici işlər nazirinin müavini, MDB ölkələri ilə əlaqələrə nəzarət edən Mixail Qaluzi RBK-ya danışıb. 

O müsahibəsində qeyd edib ki, sülhməramlıların Qarabağda varlığının davam etməsi Moskva ilə Bakı arasında müəyyən edilən kanallar vasitəsilə müzakirə ediləcək.

Nazir müavini bildirib ki, Rusiya sülhməramlı kontingentinin Qarabağda olmasına tələb var və bu, gələcəkdə də zəruri olacaq. 

Onun sözlərinə görə, sülhməramlıların qalmasını zəruri edən birinci məsələ Qarabağda qalan erməni sakinlərinin özünü rahat hiss etməsi ilə bağlıdır. Nazir müavininin qənaətincə sülməramlıların qalması Qarabağı tərk edən ermənilərin geri qayıtması üçün də əhəmiyyətlidir:

“Qarabağı tərk edənlərin bəzilərinin hansısa mərhələdə geri qayıdacağını istisna etmək olmaz. Sülhməramlıların olması bu insanlar üçün əlavə rahatçılıq yaradan amil olacaq”. 

Qaluzin sülhməramlıların qalmasını tələb edən ikinci amilin Qarabağ erməniləri ilə Bakı arasında danışıqları davam etdirmək zərurəti ilə bağlı olduğunu vurğulayıb.

O xatırladıb ki, Bakı ilə Qarabağ erməniləri arasında təmaslar sülhməramlıların vasitəçiliyi ilə həyata keçirilir:

“Qarabağın gələcək inkişafı ilə bağlı çoxlu mürəkkəb məsələlər var. Bu məsələlər Rusiya sülhməramlılarının köməyi ilə Qarabağ erməniləri və Azərbaycan hakimiyyət orqanları arasında aparılan danışıqlarla həll olunur".

Xatırladaq ki, Azərbaycanın sentyabrın 19-20 tarixlərində keçirdiyi antiterror əməliyyatdan sonra Qarabağda yaradılan qondarma rejim ləğv edilib. Antiterror əməliyyatından sonra rejimin nəzarətində olan ərazilər də Azərbaycana təhvil verilib. 

Bu prosesə uyğun olaraq ərazidə xidmət aparan Rusiya sülhməramlılarının müşahidə postları da yığışdırılır. Rusiya rəsmi dairələri bəyan edib ki, bundan sonra sülhməramlıların ərazidə qalması yalnız Bakı və Moskva arasında müzakirə olunacaq.

Vasif