“Artıq qarşıdurma səhifəsini çevirmək vaxtı çatıb” - Politoloq
“İranla münasibətlərimizdə yaşanmış gərginlik həm Azərbaycan xalqının maraqları, həm də İran xalqının gözləntiləri kontekstində anormal bir hal idi. İstisna etmirəm ki, prosesdə üçüncü qüvvələrin də özünəməxsus rolu oldu”.
Bunu Sfera.az-a açıqlamasında politoloq Tofiq Abbasov deyib. Ekspert münasibətlərdəki gərginliyin müxtəlif sferalarda problem yaratdığını qeyd edib:
“İran, belə deyək, öz göstəricilərinə və imkanlarına görə iriçəkili dünya oyunçusudur və həmişə də bildirir ki, onun əsas məqsədi qonşuluq siyasətində böyük nailiyyətlər əldə etməkdədir. Belədirsə, bəs, niyə bu niyyət Azərbaycanla bağlı özünü doğrultmadı? Bu öz yerində. Ancaq hər halda mən elə düşünürəm ki, yalnız bizim xalqlarımızı, bizim millətimizi sıx birləşdirən çox vacib motivlər var. Bu dindən, dildən, ənənələrdən keçmişimizdən, tariximizdən irəli gələn irsdir və onu əlbəttə ki, şübhə altına qoymaq olmaz. Bunun üzərində yeni potensialı qurmaq lazımdır. Bu baxımdan mən Azərbaycan prosesə tam hazırdır. Gərək, İran tərəfi də öz hazırlığını tək sözlərlə yox, həm də hərəkətlərlə nümayiş etdirsin. Əminəm ki, artıq qarşıdurma səhifəsini çevirmək vaxtı çoxdan çatıb. Digər tərəfdən, bilirsiniz ki, bu yaxınlarda da müxtəlif səviyyələrdə təmaslar oldu. Xarici işlər nazirlərinin görüşü, telefon danışıqları, sonra İranın hərbi nümayəndə heyətinin Bakıya gəlməsi ona işarə edir ki, yavaş-yavaş buzlar əriyir. Bizim münasibətlərimizdə olan gərginlik ilk növbədə sosial, iqtisadi zəmində, humanitar səviyyədə olan münasibətlərimizin dinamikasını pozur, sonra bizə itkilər gətirir”.
Politoloq yaxın zamanlarda ikitərəfli dialoqların qurulacağını və bunun müsbət nəticələr verəcəyini sözlərinə əlavə edib:
“Hesab edirəm ki, ən yaxın zamanlarda əvvəllər mövcud olmuş utancverici və cansıxıcı proseslərdən də uzaqlaşacağıq. Ümid edirəm ki, baş verənlər ancaq tarixdə qalacaq və gələcəkdə belə insidentlər təkrarlanmayacaq”.
Əzizə Zeynal
