"Tbilisidə hökuməti devirməyə çalışacaqlar" - Gürcüstan Dövlət Təhlükəsizlik Xidməti
2023-cü ilin oktyabr-dekabr aylarında Gürcüstanda hökuməti iğtişaşlar yolu ilə devirməyə çalışacaqlar. İğtişaşların başlanması Avropa Komissiyasının Gürcüstana Avropa İttifaqı (Aİ) üzvlüyünə namizəd statusu verilməsi barədə qərarı ictimaiyyətə açıqlanmasından sonraya planlaşdırılır.
Sfera.az RBK-ya istinadən xəbər verir ki, belə bir iddianı Gürcüstanın Dövlət Təhlükəsizlik Xidməti “Facebook”da paylaşıb.
Təhlükəsizlik xidmətinin məlumatına görə, sui-qəsdin təşkilatçıları arasında Gürcüstanın keçmiş daxili işlər naziri Vano Merabişvili, onun keçmiş müavini, hazırda Ukrayna əks-kəşfiyyatının direktor müavini Gia Lordkipanidze, Gürcüstanın eks-prezidenti Mixail Saakaşvilinin keçmiş təhlükəsizlik zabiti də var.
Xidmətin məlumatına əsasən, hadisələrin inkişafı üçün müxtəlif ssenarilər, o cümlədən 2014-cü ildə Ukraynada baş vermiş Avromaydana bənzər ssenarilər nəzərdən keçirilir. Planlara çadır şəhərciyi yaratmaq, Gürcüstanda mərkəzi prospektlər və strateji obyektlər yaxınlığında barrikadalar qurmaq, hökumət binalarını bağlamaq və kobud təxribat elementlərini ehtiva edən digər qanunsuz hərəkətlər daxildir.
Xatırladaq ki, Gürcüstan ötən ilin martında Moldova ilə birlikdə Aİ-yə üzv olmaq üçün müraciət edib. Aİ və NATO-ya üzvlük arzusu Gürcüstan Konstitusiyasında təsbit olunub. 2022-ci ilin iyununda Ukrayna və Moldava Aİ üzvlüyünə namizəd statusu alıblar. Gürcüstana isə lazımi islahatlardan sonra üzvlüyə namizəd statusu veriləcəyi vəd edilib. Avropa diplomatiyasının rəhbəri Josep Borrell sentyabrın 8-də bildirib ki, Gürcüstan on iki islahatdan daha doqquzunu həyata keçirməlidir. Baş nazir İrakli Qaribaşvili isə Gürcüstanın tövsiyələrin əksəriyyətini yerinə yetirdiyini və daha üçü üzərində işlədiyini deyib.
Vasif
