Çin xarici işlər naziri Vanq Yi sentyabrın 18-də Rusiyaya gedəcək. O, həmkarı Sergey Lavrovla görüşəcək. Bu barədə Rusiya Xarici İşlər Nazirliyinin sözçüsü Mariya Zaxarova bildirib. Zaxarovanın sözlərinə görə, tərəflər Ukrayna böhranını və Asiya-Sakit okean regionundakı vəziyyəti ətraflı müzakirə edəcəklər. 

Bununla bağlı Sfera.az-a açıqlama verən siyasi şərhçi Kənan Novruzov deyib ki, hazırda İran, Hindistan, Çin, Braziliya kimi dövlətlər mümkün qədər Rusiyanın yanında olmağa çalışırlar:

“Çünki başa düşürlər ki, gələcəkdə növbə onların özünə də çata bilər. Bu baxımdan Çin xarici işlər nazirinin Rusiyaya səfəri xüsusi əhəmiyyət daşıyır. Zaxarovanın dediyi kimi, tərəflərin əsas müzakirə mövzusu, yəqin ki, Ukraynadakı müharibə olacaq. Rəsmi Pekin müharibədə Rusiyanın uduzmasını istəmir, mümkün qədər dəstək verir. Baş diplomatların görüşündə Çinin Rusiyaya silah tədarükü məsələsi barədə fikir mübadiləsi aparıla bilər. Rusiyanın silah ehtiyatları getdikcə azalır və hazırda Çin onu silahla təmin edə biləcək nadir dövlətlərdəndir”.

Müsahibimizin sözlərinə görə, Çin xarici işlər nazirinin Rusiyaya səfəri indiki halda Kreml üçün müstəsna əhəmiyyət daşıyır:

“Rəsmi Moskva dünyadan təcrid olunmadığını və hələ də müttəfiqlərinin olduğunu göstərir.  Çinin xarici işlər nazirinin Rusiyaya səfəri zamanı hansısa razılıqların əldə olunması mümkündür. Amma bu, Ukraynadakı müharibənin gedişatına ciddi təsir etməyəcək”.

Günay Rəsulqızı