"Rusiya TIR-ının Xankəndiyə yetişməsi..." - Ağdam-Xankəndi yolu ilə bağlı MÜHÜM AÇIQLAMA

Dünən Azərbaycanın Qarabağ iqtisadi rayonunda yaşayan ermənilərin ərzağa olan ehtiyaclarını qarşılanması məqsədilə Rusiya Qırmızı Xaç Cəmiyyəti tərəfindən göndərilən humanitar yük Ağdamdan Xankəndiyə yola düşüb. Ərzaq və qeyri-ərzaq məhsulları yüklənmiş TIR Rusiya sülhməramlılarının postundan Əsgəran-Xankəndi istiqamətinə keçib. Yükün Ağdam-Xankəndi yolu ilə Qarabağda yaşayan ermənilərə çatdırılması nəzərdə tutulur.

Bəs bu gedişat Ağdam-Xankəndi yolunun işlək vəziyyətə düşdüyü mənasına gəlirmi?

Politoloq Elxan Şahinoğlu Sfera.az-a açıqlamasında bildirib ki, Rusiyanın humanitar yardım TIR-ının Ağdam-Xankəndi yolundan keçməsi böyük addımdır:

“Rusiyanın yük maşınının Ağdamdan keçərək Xankəndiyə yetişməsi tilsimin qırılması baxımından başlanğıc sayıla bilər, ancaq bu, azdır. Bu yoldan sadəcə, Rusiyaya aid yük maşını keçib, bizim yüklər qalıb. İndi Ermənistan və Qarabağ separatçıları yenə dirənəcəklər ki, “bəs Ağdam-Xankəndi yolu açıldı, Laçın yolu da açılmalıdır”. 

Politoloq bundan sonra Laçın yolunun açılması barədə məsələrə aydınlıq gətirib:
    

“Birincisi, Ağdam-Xankəndi yolunun işlək vəziyyətə düşdüyünü söyləmək tezdir. İkincisi, Laçın yolundan keçəcək yüklərə görə, Ermənistan Azərbaycana gömrük vergisi ödəməyə razılaşacaqmı? Gömrük vergisi ödəmək üçün isə qonşu ölkənin Azərbaycanın ərazi bütövlüyünü tanıması və müvafiq ticarət sazişlərinin imzalanması vacibdir. Bunların heç biri yoxdursa, Laçın yolu ilə bağlı tələsməyə ehtiyac yoxdur”.

Firuzə Əliyeva