Son zamanlar Rusiya-İran münasibətlərində istiləşmə sezilir. İki dövlət arasında müxtəlif sferalarda əməkdaşlıq qurulur, müqavilələr imzalanaır. Bütün bunların fonunda, İranın Ermənistanla münasibətlərində bir qədər sərinləşmə müşahidə edilir.

Maraqlıdır, İranın Rusiya ilə münasibətlərinin sıxlaşdığı zamanda Ermənistanla əlaqələri soyuq fazaya keçə bilərmi? Ümumiyyətlə, bu İranın Azərbaycanla əlaqələrində ciddi dəyişiklik gözlənilirmi?

Mövzu ilə bağlı Sfera.az-a danışan deputat Cavanşir Paşazadə İranla müxtəlif istiqamətlərdə əlaqələrin inkişaf edəcəyini deyib:

"İran Xəzəryanı ölkələr üçün mühüm əhəmiyyət kəsb edən logistikanın qurulmasında, bundan birbaşa istifadədə maraqlıdır. İran həm də yaşıl enerji ilə əlaqədar Azərbaycanla əməkdaşlıq etmək niyyətindədir. İran bizə yaxın, qonşu ölkədir, bu baxımdan müxtəlif istiqamətlərdə əlaqələrin inkişafı gözləniləndir və aparılan danışıqlar da buna zəmin yaradır. Xüsusilə Qarabağda yenidənqurma işlərində, müxtəlif layihələrin həyata keçirilməsində İranın iştirakı mühümdür. Artıq Türkmənistan qaz kəməri də bizim bölgədən keçir. Bu da qonşuluq əlaqələrinin möhkəmlənməsinə təkan verəcək”.

Deputat Cənubi Qafqazdakı sülhün İran iqtisadiyyatına müsbət təsir edəcəyini qeyd edib:

"İranın bundan əvvəlki mövqeyi ilə indiki arasında çox böyük fərqlər var. Düzdür, müəyyən dövr ərzində anlaşılmazlıqlar oldu, Əvvəl İranın gözü bizi götürmürdü, lakin bütün bunlar da tərəfimizdən cavabsız qalmadı. Lakin sonradan İran rəhbərliyinin münasibətindən aydın oldu ki, Cənubi Qafqazda sülhün bərpası artıq Azərbaycandan asılıdır. İran və onun kimi dövlətlər anlamırdı ki, Azərbaycan prezidenti siyasəti ilə elə bir mənzərə yaradacaq ki, dünya Azərbaycan siyasətindən danışacaq. İndi İran başa düşüb ki, Cənubi Qafqazda sülhün təminatı onun da iqtisadiyyatının güclənməsi ilə nəticələnəcək”.

Əzizə Zeynal