“Arayik Arutunyan Azərbaycanın tələbi ilə istefa verib\" - Açıqlama

“Araik Arutunyanın istefası Qarabağdakı xaosun qarşısını ala bilməyəcək”.

Sfera.az bildirir ki, bunu politoloq Elxan Şahinoğlu deyib.  O qeyd edib ki, Araikin “vəzifəsini” müvəqqəti icra edən növbəti separatçının iki seçimi olacaq:

“Həmin şəxs ya Arutunyanın təxribatçı siyasətini davam etdirəcək, ya da Bakı ilə dialoqa razılaşacaq və Ağdam-Xankəndi yolunun açılmasını təmin edəcək. Bu iki seçim də separatçıların yeni “lideri”ni xilas etməyəcək. Hər iki variant separatçılar və bölgə erməniləri arasında ixtilafı dərinləşdirəcək. Bu, bizim üçün faydalıdır. Eyni zamanda, biz separatçıların işğal altındakı bölgədə “prezident seçkisi” keçirməsinə imkan verməməliyik”.

Politoloq Məhəmməd Əsədullazadə isə deyib ki, Arayik Arutunyan Azərbaycanın tələbi ilə “istefa” verib:

“Araik reinteqrasiya siyasətinə mane olaraq birbaşa Kremlin göstərişlərini yerinə yetirirdi. Növbəti mərhələdə Ruben Vardanyan da Qarabağı tərk edəcək. Azərbaycan reinteqrasiya siyasətini davam etdirəcək. Erməni icması ilə Azərbaycan arasında birbaşa üçüncü tərəfin iştirakı olmadan dialoqun qurulması mümkündür”.

Xatırladaq ki, Azərbaycanın Qarabağ iqtisadi rayonundakı terrorçu-separatçıların başçısı Araik Arutunyan istefa verib. O, bu barədə sosial şəbəkə səhifəsində yazıb. O, 2020-ci il may ayının 21-dən terrorçu-separatçılara rəhbərlik edirdi.

Günay Rəsulqızı