“Ukrayna mümkün qədər tez NATO-ya qəbul edilməlidir” - Boris Conson
“Qərb güclü olmalı və Ukraynanı mümkün qədər tez NATO-ya qəbul etməlidir”.
Sfera.az xəbər verir ki, bunu Ukraynanın NATO-ya üzv olmaq istəyini şərh edərkən İngiltərənin keçmiş Baş naziri Boris Conson deyib.
Keçmiş Baş nazir “Daily Mail”ə açıqlamasında bildirib ki, Qərb qorxmamalı və qətiyyətli addımlar atmalıdır. O Vilnüs görüşündə NATO liderlərini qətiyyətsiz davranmaqda günahlandırıb:
“NATO liderləri bu həftə Vilnüsə gələndə onların nə etməli olduqları çox aydın idi. Onlar güclü olmalı idilər. NATO-nun bütün məqsədi budur. Alyans Ukraynaya açıq şəkildə söyləməliydi ki, bu ölkə hərbi əməliyyatlar bitən kimi bloka qoşula biləcək. Bu, ən doğru mesaj idi. Amma bunun əvəzində liderlər Ukraynaya NATO üzvləri razılaşdıqda və Ukrayna şərtləri yerinə yetirdikdə NATO-ya dəvət olunacağı mesajını veriblər. Buna görə də prezident Zelenski məyus olub”.
O, blokun 2008-ci ildə Buxarestdə keçirilən sammitini xatırladıb: “Həmin tarixdə Ukrayna və Gürcüstanın gələcəkdə NATO-ya daxil olmasının mümkün olması ilə bağlı qərar qəbul edilib. Müttəfiqlər nə vaxt razılığa gələcəklər? Şərtlər nə vaxt yerinə yetiriləcək? Müttəfiqlər bütün bunları 15 il əvvəl razılaşdırıblar! Heç bir ölkə NATO-ya üzv olmaq üçün Ukrayna qədər səy göstərməyib. Heç bir hərbi qüvvə NATO silahlarının istifadəsində bu qədər güclü və effektiv deyil. Heç bir ölkənin NATO üzvlüyünə bu qədər ehtiyacı yoxdur”.
Qeyd edək ki, NATO-nun Vilnüsdə keçirilən sammitində Ukraynanın alyansa ən geci hansı tarixdə üzv olacağı müəyyən edilmədi. Bununla belə, NATO-nun Baş katibi Yens Stoltenberq proseduru sadələşdirməyə söz verdi.
Vasif
