“Xeyr, uşaqlar buna razı deyil..." - Putin Priqojinlə Kremldəki görüşündən DANIŞDI

Rusiya prezidenti Vladimir Putin ilk dəfə olaraq “Vaqner” özəl hərbi şirkətinin (PMC) təsisçisi Yevgeni Priqojin və bu qrupun komandirləri ilə görüşün təfərrüatlarını açıqlayıb.

Sfera.az xəbər verir ki, Putinin sözlərinə görə, görüşdə o, özəl hərbi şirkətin nümayəndələrinə bir neçə iş variantını, o cümlədən birbaşa Sedoy ləqəbli komandirin rəhbərliyi altında işləməyi təklif edib.

Dövlət başçısı qeyd edib ki, bu barədə danışanda orada olanların çoxu başını tərpədib. Amma Yevgeni Priqojin prezidentin təklifindən imtina edərək “Xeyr, uşaqlar belə bir qərarla razılaşmırlar” deyib. Prezident "Vaqner"in taleyi ilə bağlı digər təkliflərin təfərrüatlarını açıqlamayıb.

"Vaqner" özəl hərbi şirkətinin döyüş bölməsi kimi qalıb-qalmayacağı ilə bağlı suala cavab olaraq prezident qeyd edib ki, bu təşkilat Rusiyada formal olaraq ümumiyyətlə mövcud deyil.

Putinin sözlərinə görə, Rusiyada PMC-lərin (özəl hərbi şirkətlər) faktiki leqallaşdırılması ilə bağlı ayrıca məsələ var. “Ancaq bu, Dövlət Dumasında, hökumətdə müzakirə edilməli olan məsələdir”, - deyə dövlət başçısı əlavə edib.(Publika.az)