\"Narışkin kimi adamlarla...\" - Ukraynadan Rusiya ilə danışıqlar aparan ABŞ -yə SƏRT REAKSİYA

Rusiya Xarici Kəşfiyyat Xidmətinin direktoru Sergey Narışkin amerikalı həmkarı ilə müzakirələr aparıb.

Sfera.az bildirir ki, bu barədə Narışkin “TASS”a açıqlama verib. Belə ki, o, “Vaqner” üsyanından sonra ABŞ Mərkəzi Kəşfiyyat İdarəsinin rəhbəri Uilyam Börnsə zəng edib. Narışkinin sözlərinə görə, təxminən bir saat davam edən danışıqların əsas müzakirə obyekti sözügedən qiyam və Ukrayna olub:

“Amerikalı həmkarımla telefon danışığı 24 iyunda olub. Söhbətin əsas hissəsi Ukrayna ətrafında baş verən hadisələrin müzakirəsinə yönəlmişdi”.

Narışkin həmçinin bildirib ki, müharibə ilə bağlı danışıqlar nə vaxtsa mümkün olacaq.  “TASS” agentliyi bunun onun Börns ilə söhbətinin bir hissəsi olub-olmadığını dəqiqləşdirməyib. “Danışıqların gec-tez baş tutmasının mümkünlüyü faktı təbiidir. Çünki istənilən münaqişə, o cümlədən silahlı münaqişə danışıqlarla başa çatır, lakin onlar üçün şərait yetişməlidir", - deyə o söyləyib. ABŞ Mərkəzi Kəşfiyyat İdarəsi isə onun sözlərini şərh etməkdən imtina edib.

Ukrayna Prezidentinin ofis rəhbərinin müşaviri Mixaylo Podolyak  “Reuters” agentliyinə sözügedən açıqlama ilə bağlı danışıb. “Bu gün Narışkin kimi birinin bu müharibənin necə bitəcəyi ilə bağlı rıçaqları yoxdur”, - o söyləyib. Podolyak bildirib ki, Rusiya müharibədə uduzur və Narışkin kimi insanlarla danışıqlar aparıla bilməz.

Qeyd edək ki, Börns və Narışkin keçən ilin noyabrında Ankarada görüş keçiriblər. Bundan sonra ABŞ rəsmiləri Börnsün heç bir növ danışıqlar aparmadığını  və Ukrayna müharibəsinin həll yollarını müzakirə etmədiyini israrla bildirib. 

Günay Rəsulqızı