Ərdoğan Putinin arxasından niyə çəkildi? – Ankaranın yönünü dəyişdirən ÜÇ SƏBƏB
Bu həftə Litvanın paytaxtı Vilnüsdə keçirilən NATO Liderlər Zirvə toplantısında Prezident Rəcəb Tayyib Ərdoğanın İsveçin NATO üzvlüyünə “yaşıl işıq” yandırmasından və Qərb düşərgəsini təmsil edən ölkələrin lideri ilə keçirdiyi faydalı görüşlərdən sonra “Wall Street Journal” nəşri maraqlı iddia ilə çıxış edib.
Sfera.az xəbər verir ki, qəzet araşdırma məqaləsində Ərdoğanın tədricən Putundən uzaqlaşmağa başladığını yazıb. “Wall Street Journal” buna səbəb kimi Türkiyənin iqtisadi problemlərinin ağır olmasını, onların həllinin Qərbdən asılı olmasını, eyni zamanda Rusiyanın müttəfiq kimi zəifləməsini göstərib.
Şərhə görə Ərdoğan xarici siyasətində Qərbə yönəlib və bu, Ukrayna müharibəsində qüvvələr balansına təsir edə bilər:
“Ərdoğan pisləşən iqtisadiyyata dəstək tapmaq üçün ABŞ və onun qərbli müttəfiqləri ilə əlaqələrini gücləndirməyə çalışır. Türkiyə prezidentinin ötən həftə Ukrayna lideri Zelenskini qəbul etməsi, İsveçin NATO-ya üzv olmasına şərait yaratması, bu ölkənin ABŞ və Avropa ilə münasibətlərini yumşaldacaq, eyni zamanda “F-16”ların alışına, modernləşdirilməsinə razılığın əldə edilməsinə şərait yaradacaq”.
Qəzet məqaləsində münasibətlərin yaxşılaşmasında Qərbin tələsmədiyini də vurğulayır.
“Qərb Ərdoğanı yoxlayacaq. Onun münasibətlərin yaxşılaşmasında nə dərəcədə səmimi olduğunu öyrənməyə çalışacaq”, - yazılan məqalədə ekspertlər Ərdoğanın Qərbə yaxınlaşmasının arxasında üç əsas səbəb görürlər:
“Birinci səbəb Putinin zəifləməsidir. “Vaqner”in üsyan cəhdindən sonra Ərdoğan Putinin zəiflədiyinə əmin olub. Artıq Ərdoğan Rusiya liderinə görə Qərblə əlavə problemlər yaşamaq istəmir.
İkinci səbəb Türkiyə iqtisadiyyatında vəziyyətin pisləşməsi və xarici valyutaya artan tələbin ödənilə bilinməməsidir. Ərdoğan böyük məbləğdə xarici valyutanın yalnız Qərbdən əldə ediləcəyinə əmin olub.
Üçüncü səbəb isə Qərblə münasibətlərin pisləşməsindən sonra Türkiyənin Avropa İttifaqına üzvlük prosesinin iflasa uğramasıdır”.
Qəzetə danışan ekspertlərin iddiasına görə sadalanan amillər Ərdoğanı Qərblə yaxınlaşmağa vadar edir.
Vasif