Brüsseldə növbəti Əliyev-Paşinyan görüşü baş tutacaq - NƏ GÖZLƏNİLİR?

Belçikanın paytaxtı Brüsseldə Azərbaycan Prezidenti İlham Əliyevlə Ermənistanın baş naziri Nikol Paşinyan arasında görüş olacaq. Bunu iyulun 6-da hökumətin iclasında N.Paşinyan deyib. O, söyləyib ki, görüş Avropa İttifaqı Şurasının Prezidenti Şarl Mişelin vasitəçiliyi ilə keçiriləcək.

Bununla bağlı Sfera.az-a açıqlama verən politoloq Məhəmməd Əsədullazadə deyib ki, Brüsseldə keçiriləcək görüşdə Paşinyan Azərbaycanın şərti ilə razılaşa bilər:

“Avropa İttifaqının vasitəçiliyi ilə keçiriləcək görüşdə sülh müqaviləsinin detalları və danışıqlar prosesində olan fikir ayrılıqları müzakirə ediləcək. Fikrimcə, Brüssel görüşündə sülh müqaviləsinə əngəl olan Qarabağda Ermənistan silahlı qüvvələrinin qalıqlarının çıxarılması məsələsi diqqət mərkəzində olacaq.  Burada Paşinyan Azərbaycanın təklifi ilə razılaşa bilər. Çünki Ermənistanın irəli sürdüyü təkliflər sülh müqaviləsinin bağlanması istiqamətində istənilən danışıqları pozur”.

Ekspert bildirib ki, Brüsseldə Ermənistan Baş naziri öz mövqeyindən geri çəkilməsə, Azərbaycan Qarabağda “Qisas” əməliyyatlarına başlaya bilər:

“Həmçinin şərti sərhəddə yeni strateji mövqelər nəzarət altına alına bilər. Ermənistanın əlavə alternativi onun yeni strateji ərazilər itirməsi ilə nəticələnəcək”.

Günay Rəsulqızı