Rusiya Krımın müdafiəsini gücləndirməyə başlayıb. Bu barədə Böyük Britaniya kəşfiyyatı məlumat yayıb.  

Bununla bağlı Sfera.az-a açıqlama verən siyasi şərhçi Kənan Novruzov xatırladıb ki, Ukrayna rəsmiləri, o cümlədən prezident Volodimir Zelenski daha əvvəl bir neçə dəfə müharibənin torpaqların, o cümlədən Krımın işğaldan azad olunması ilə başa çatmalı olduğunu deyib:

“Krımda hərəkətlənmənin güclənməsi Rusiya Silahlı Qüvvələrinin diqqətini Ukraynanın döyüş gedən torpaqlarından yayındıracaq. Bu, əks-hücum əməliyyatlarının daha effektiv olmasına şərait yaradacaq. Ukrayna bu yolla Krımla bağlı gələcək hədəflərinə daha çox yaxınlaşa biləcək. Digər tərəfdən, Rusiya daxilində xaos güclənəcək. Bu mənada düşünmək olar ki, Ukraynanın Krımla bağlı addımları artacaq. Görünür, bunu artıq Rusiyada da hiss edirlər”.

Ekspert bildirib ki, yarımadanın yaxın zamanda işğaldan azad ediləcəyi inandırıcı görünmür:

“Bu, kifayət qədər çətindir. Amma Krımdakı fəallıq Rusiyanı panikaya salmaq, çaşdırmaq baxımından xüsusi əhəmiyyətə malikdir. ABŞ-nin F-16 qırıcılarının tədarkündən sonra Krımda fəallığın, o cümlədən hava hücumlarının sayının artması gözləniləndir. Rusiya indidən bu ssenariyə hazırlaşmağa başlayıb. Əgər Krıma hücumlar intensivləşərsə, bu, gələcəkdə Rusiya qoşunlarının Ukraynanın digər torpaqlarından çıxması ilə nəticələnə bilər”.

Günay Rəsulqızı